Əmək və Əhalinin Sosial Müdafiəsi Nazirliyinin tabeliyində olan Dayanıqlı və Operativ Sosial Təminat (DOST) Agentliyi fantastik qiymətə inzibati binanı icarəyə götürüb. 

Valyuta.az elektron satınalmalar portalına istinadən xəbər verir ki, Agentlik “2 saylı Bakı DOST Mərkəzi” üçün inzibati bina sahəsinin icarəyə götürülməsi ilə bağlı tender keçirib. Tenderin qalibi “Avtomotoservis” ASC seçilib. DOST Agentliyi sözügedən şirkətə sahəsi 1 293,9 kv. metr olan qeyri-yaşayış sahəsinin illik icarəsi üçün 2 milyon 15,4 min manat ödəyib. 

Bu isə o deməkdir ki, DOST Agentliyi icarəyə götürdüyü ofisin 1 kvadratmetri üçün illik 1 558 manat, aylıq isə 129,8 manat ödəyib. 

2 saylı Bakı DOST Mərkəzi 2019-cu ilin dekabr ayından fəaliyyət göstərir. Mərkəz Bakının Şüvələn qəsəbəsində, Almaz İldırım küçəsi 30 B ünvanında yerləşir. Bu ünvan ərazi baxımında 10-cu zona hesab olunur. 

Qeyd edək ki, Bakıda biznes obyektlərinin kv.m üzrə aylıq icarəsi 8-30 manat arasında dəyişir. Daşınmaz əmlak bazarı üzrə təhlillər göstərir ki, yalnız şəhərin mərkəzi hissələrində qeyri-yaşayış sahələrinin icarəsi 100-150 manata başa gələ bilər. Şəhərin kənar hissəsi hesab edilən 10-cu zonada inzibati binanın icarəsinin aylıq 130 manatdan hesablanması fantastik qiymət hesab edilir. “İnzibati binada hansı texnologiyalar tətbiq edilməlidir ki, bu qiymətə təklif edilsin. Bu isə qeyri-müəyyəndir” - əmlak bazarı üzrə ekspertlər bildiriblər.

Pünhan