Bu ilin fevral ayında Azərbaycan vətəndaşları Türkiyədə 77 mənzil alıb.

Valyuta.az-ın Report.az-a istinadən verdiyi məlumata görə, bu barədə Türkiyənin Statistika İdarəsinin yaydığı hesabatda bildirilib.
Hesabata görə, bu, 2020-ci ilin fevral ayı ilə müqayisədə 13 mənzil və ya 14,4 % azdır.

Ümumilikdə isə yanvar-fevral aylarında 145 Azərbaycan vətəndaşı Türkiyədə mənzil alıb ki, bu da 2020-ci ilin iki ayı ilə müqayisədə 44 ədəd və ya 23,3 % azdır.

Qeyd edək ki, bu ilin fevral ayında Türkiyədə 2 995 ədəd əmlak xarici vətəndaşlara satılıb ki, bu da 2020-ci ilin fevral ayı ilə müqayisədə 1 053 ədəd və ya 26 % azdır.

Bu ilin yanvar-fevral aylarında isə Türkiyədə 5 707 əcnəbi əmlaka sahib olub ki, bu da ötən ilin iki ayı ilə müqayisədə 2 286 ədəd və ya 28,6 % azdır.

Türkiyədə ən çox mənzil alan İran vətəndaşları olub. Bu ölkədən olanlar fevralda 477, yanvar-fevral aylarında isə 936 mənzil əldə edib.

Növbəti yerdə İraq vətəndaşları qərarlaşıb. Bu ölkədən olanlar ötən ay qardaş ölkədə 432, yanvar-fevralda isə 817 mənzil alıb.

İlk 3-lüyü Rusiya vətəndaşları tamamlayır. Bu ölkədən olan vətəndaşlar fevralda 259 mənzil, yanvar-fevralda isə 519 mənzilə sahib olub.