Cari ilin yanvar ayına qədər ölkə daxilində plastik kartlar vasitəsi ilə nağd pulun çıxarılmasında artım müşahidə olunub.

Valyuta.Az xəbər verir ki, 2021-ci ilin yanvar ayına olan göstəricilərə görə, ATM-lər vasitəsi ilə pulların nağdlaşdırılması əməliyyatı ötən ilin analoji dövrü ilə müqayisədə 65 min ədəd və ya 1% artaraq 6 milyon ədəddən çox olub. Belə ki, ötən il bu rəqəm 5 mln. 942 min ədəd olub. 

Cari ildə ATM-lər vasitəsi ilə 1 mln. 456 min manat həcmində vəsait nağd şəkildə çıxarılıb ki, bu da 2020-ci ilin yanvar ayı ilə müqayisədə 190 min manat və ya 15% artım deməkdir. Halbuki, bu rəqəm ötən il 1 mln. 266 min manat vəsait təşkil edib.

Cari ilin yanvar ayında vəsaitin POS-terminal vasitəsi ilə çıxırılması əməliyyatında isə azalma müşahidə olunub. Belə ki, əgər ötən ilin müvafiq dövründə aparılan əməliyyatın sayı 16 min ədəd olmuşdusa, cari ildə bu rəqəm 6.25% azalaraq 15 min ədəd olub. Bununla belə, nağdlaşdırılan vəsaitin həcmində artım müşahidə olunub. Yəni, ötən il aparılan əməliyyatlar zamanı 65 milyon manat çıxarılmışdısa, bu rəqəm cari ildə 12.3% artaraq 73 milyon manat olub. 

Bu ilin yanvar ayına olan hesabata görə, ölkədə ümumilikdə 1 mln. 529 min manat pul vəsaiti nağdlaşdırılıb. Bu, ötən ilin analoji dövrü ilə müqayisədə  198 min manat və ya 14.9% çoxdur. 

Qeyd edək ki, ödəniş kartlarının ümumi sayında dəyişiklik statistik vahidlərin ödəniş kartları ilə bağlı məlumatların yenidən təsnifatlaşdırılması ilə bağlıdır.

Rövşən Ziya