Azərbaycanın ən böyük yol tikinti şirkətlərindən biri olan “AzVirt” MMC 2023-cü ili 7,52 milyon manat mənfəətlə başa vurub. 

Valyuta.az-ın hesablamasına görə, bu? əvvəlki illə nisbətən 16 % və ya 1,42 milyon manat azdır. Şirkət 2022-ci il üzrə 8,94 milyon manat xalis mənfəət açıqlamışdı. 
Ötən il “Azvirt” MMC-nin tikinti işlərindən gəlirləri 833,6 milyon manat (illik müqayisədə 45,5 % çox) təşkil edib. 764,8 milyon manat xərclər çıxıldıqdan sonra ümumi gəliri 68,7 milyon manata bərabər olub ki, bu da 2022-ci ilə nisbətən 17,6 % çoxdur. 

Şirkətin ümumi və inzibati xərclərində, maliyyə aktivləri üzrə kredit itkiləri və digər xərclərində kəskin artım olun əməliyyat gəlirlərinə mənfi təsir edib. 
Belə ki, “Azvirt”in əməliyyat gəlirləri 2022-ci ilə nisbətən ötən il 1 milyon manata yaxın azalaraq 24,56 milyon manata enib. 

31 dekabr 2023-cü il tarixinə “AzVirt” MMC-nin cəmi aktivləri 385,4 milyon manatdan 387,5 milyon manata, cəmi kapitalı 59,1 milyon manatdan 69,2 milyon manata yüksəlib, cəmi öhdəlikləri isə 326,3 milyon manatdan 318,4 milyon manata enib.  

Qeyd edək ki, “Azvirt” MMC-nin təsisçiləri Almaniyanın “Martin Beteiligungs GmbH & Co KG” (30 %), Walz GmbH & Co KG” (20 %), Lüksemburqun “Falcom Holding s.a.r.l” (25 %) şirkətləri və Elnur Əliyevdir (25 %). 
“AzVirt” MMC yol və hava limanı infrastruktur layihələri üzrə tam xidmət göstərən beynəlxalq şirkətdir.

Pünhan