2023-cü ilin yekunlarına əsasən, Azərbaycanda yaşayan insanlar ən çox pulu dekabrda, ən az pulu isə apreldə xərcləyib. 

Dövlət Statistika Komitəsindən bildirilir ki, əhalinin dekabrdakı istehlak xərcləri 9,237 milyard manat olub. Bu məbləğ il ərzində xərclənən vəsaitin 12,7 faizini təşkil edib. 

İl ərzində daha az pul apreldə xərclənib. Bu ayda əhali istehlak üçün 4,45 milyard manat ayırıb. 

Əhalinin xərcləri 2 hissədən – mal və xidmətlərə çəkilən xərclərdən ibarətdir. Malların (ərzaq və qeyri-ərzaq) alınmasına çəkilən xərc dekabrda ən yüksək səviyyəyə çatıb. İlin son ayında əhali ticarət müəssisələrində 7,72 milyard manat xərcləyib. 

Ticarət müəssisələrində ən az pulun xərclənməsi apreldə qeydə alınıb. İlin dördüncü ayında 3,4 milyard manat pul xərclənib. 

Pullu xidmətlərə də ən çox xərc dekabrda müşahidə edilib. Dekabrda pullu xidmətlərə xərclənən vəsait 1,3 milyard manata çatıb. 

Pullu xidmətlərə ən az pul isə fevralda xərclənən 851 milyon manat olub.

Pullu xidmətlərin digər hissəsi olan ictimai iaşə xərcləri də dekabrda maksimum səviyyəyə çatıb. Əhali ilin son ayında yeyib-içməyə 222 milyon manat pul ayırıb. Ötən il əhali ən az fevralda yeyib-içib. Həmin ayda ictimai iaşə xərcləri 125 milyon manat olub. 

© Sfera