Cənubi Koreyada yerləşən “DoubleU Games” şirkəti Türkiyənin mobil oyun startapı “Paxie Games”i almaq üçün müqavilə imzalayıb.

Valyuta.az xəbər verir ki, razılaşmaya əsasən, ilk mərhələdə “Paxie Games”in səhmlərinin 60 faizi “DoubleU Games” tərəfindən 27 milyon dollara alınacaq. Səhmlərin qalan 40 faizi müəyyən maliyyə hədəflərinin yerinə yetirilməsi şərti ilə növbəti üç il ərzində 40 milyon dollara çata biləcək əlavə ödənişlə alınacaq. Bir sözlə, bu məqsədlər reallaşarsa, “Paxie Games” “DoubleU Games”ə 67 milyon dollara satılacaq . Edilən açıqlamalara görə, alışın birinci mərhələsinin 2025-ci ilin birinci rübündə başa çatdırılması gözlənilir.

2021-ci ildə Direnç Çelik, Hüseyin Anıl Özmen, Refik Anıl Bulut və Sarenur Başel tərəfindən İstanbulda qurulan “Paxie Games” “Merge Studio: Fashion Makeover” oyunu ilə 25 milyondan çox istifadəçiyə çataraq ciddi uğur qazanıb. “Paxie Games” “Merge Studio” oyunundan əlavə “Tile Star” və “Mahjong Infinity” kimi oyunlar təklif edir.

Türkiyənin ən istedadlı komandalarından birinə sahib olduqları üçün təxminən 3 il kimi qısa müddətdə böyük nailiyyətlər əldə etdiklərini ifadə edən “Paxie Games” CEO-su Direnç Çelik bu müqavilə ilə şirkətləri üçün çox həyəcanlı bir böyümə dövrünə qədəm qoyduqlarını bildirib.

“DoubleU Games” Baş Maliyyə Direktoru Jay Choinun sözlərinə görə, onlar “Paxie Games”in alınması ilə həm böyümələrini sürətləndirməyi, həm də oyun portfoliolarını genişləndirərək yeni imkanlar yaratmağı hədəflədiklərini ifadə edir.

Əvəz Həsənov