“Azərbaycanın dövlət gəlirlərinin formalaşmasında neftdən əldə etdiyimiz gəlirlərin xüsusi payı var və ümumi ixracatımızın təxminən 80 faizi neft və neft məhsullarıdır. Bu kontekstdə neftin dünya bazarında qiyməti fizikal gəlirlərin artması, ölkəyə daxil olan valyutanın həcmi baxımdan çox vacibdir”.

Bu sözləri iqtisadçı Vüqar Bayramov bildirib.

O əlavə edib ki, 2024-cü ilin dövlət büdcəsində bir barrel neftin qiyməti 75 dollar nəzərdə tutulub: "Hazırda dünya bazarında neftin qiyməti 79 dollara təklif olunur. Əvvəlki aylarda - 2024-cü ilin ilk yeddi ayında neftin dünya bazarındakı qiyməti təxminən 80 dollar ətrafında dəyişib.

Bu o deməkdir ki, növbəti aylarda orta qiymət 70 dollar olarsa, praktik olaraq büdcədə nəzərdə tutulan qiymətə uyğun qiymət formalaşacaq. Büdcə praktik olaraq 75 dollardan hesablanaraq dünya bazarındakı qiymətə uyğunlaşacaq.
Amma bütün hallarda neftin dünya bazarındakı qiymətinin azalmasına baxmayaraq, fiskal xərcləmələrimizdə hər hansı bir çətinliyin və yubanmanın olacağı gözlənilmir. Büdcədə nəzərdə tutulan bütün sosial xərclər və digər ödənişlər vaxtında və nəzərdə tutulan məbləğdə həyata keçiriləcək.

Ona görə də dövlət büdcəsindən həyata keçirilən əməkhaqqı, pensiya, müavinət və digər sosial ödənişlərdə yubanmaların və ya azalmaların olacağı gözlənilmir. Əksinə, büdcə dürüstləşməsi nəticəsində sosial xərclərdə müəyyən artımlar nəzərdə tutulub. Xüsusən də bu xərclər pensiya ödənişləri üçün nəzərdə tutulan xərclərdir.

Neftin dünya bazarındakı qiymətinin aşağı düşməsinə baxmayaraq, sosial ayırmalarda əmək haqqı, pensiya, müavinət və digər ödənişlərdə hər hansı bir azalmalar gözlənilmir, nəzərdə tutulmayıb. vaxtı vaxtında köçürmələri həyata keçirmək mümkün olacaq. Azərbaycanda büdcədən ayrılan vəsaitlərin həcminə və bütövlükdə xərcləmələrə hər hansı bir mənfi təsir göstərməyəcək və təsdiq olunan büdcəyə uyğun olaraq sosial və digər ayırmalar həyata keçiriləcək”./BAKU.WS