Azərbaycan Respublikası vətəndaşlarının öz adını, ata adını və soyadını dəyişdirməsinə 18 yaşına  çatdıqdan sonra icazə verilir. 

18 yaşına çatan hər bir şəxs lazım olan sənədləri təqdim etməklə ASAN xidmət mərkəzlərində öz ad və soyadlarını dəyişə bilərlər.

Valyuta.az həmin sənədlərin siyahısını təqdim edir:

-    Adın, ata adının və soyadın dəyişdirilməsi haqqında ərizə;
-    Ərizə verən şəxsin doğumu haqqında şəhadətnamə;
-    Ərizə verən şəxs nikahdadırsa, nikah haqqında şəhadətnamə;
-    Ərizə verən şəxsin nikahı pozulmuşdursa, nikahın pozulması haqqında şəhadətnamə;
-    Ərizə verən şəxsin yetkinlik yaşına çatmayan uşaqları vardırsa, onların doğumu haqqında şəhadətnamələr;
-    Şəxsiyyəti təsdiq edən sənədin notariat qaydasında təsdiq olunmuş surəti;
-    Hərbi mükəlləfiyyətləri olan şəxslər üçün isə ilkin hərbi qeydiyyata alınma haqqında vəsiqənin və ya hərbi biletin notariat qaydasında təsdiq edilmiş surəti;
-    Ərizə verən şəxsin 3x4sm ölçüdə 2 ədəd fotoşəkili;
-    Dövlət rüsumunun ödənilməsi barədə sənəd;

Dövlət rüsumunun məbləği isə 15 manatdır.

18 yaşına çatmamış uşaqların ad və soyadlarının dəyişməsi hər iki valideyinin icazəsi və iştirakı ilə həyata keçirilir. 

Valideynlər olmadıqda isə notariat qaydasında təsdiq olunmuş etibarnamə əsasında səlahiyyətli şəxslər bu prosesdə iştirak edə bilər.

Bundan başqa hər iki valideynin soyadı dəyişdirildikdə, yetkinlik yaşına çatmayanların soyadı dəyişdirilir. Soyadı valideynlərdən biri dəyişdirərsə, onun yetkinlik yaşına çatmayan uşaqlarının soyadının dəyişdirilməsi məsələsi valideynlər arasında razılığa görə, razılıq olmadıqda isə yerli icra hakimiyyətinin qəyyumluq və himayə orqanı tərəfindən həll edilir.

Davud