Sosial müdafiəyə xüsusi ehtiyacı olan və işə düzəlməkdə çətinlik çəkən şəxslərin kateqoriyaları üzrə faiz dərəcələri təsdiqlənəcək. Bu, Prezident İlham Əliyevin müvafiq fərmanında əksini tapıb.

Valyuta.az-a danışan iqtisadçı ekspert Xalid Kərimli bildirdi ki, 20 yaşadək gənclər, yetkinlik yaşına çatmamış uşaqları tərbiyə edən tək və çox uşaqlı valideynlər, 18 yaşadək əlilliyi müəyyən edilmiş şəxslər, pensiya yaşına iki ildən az qalmış şəxslər, məcburi köçkünlər, müharibə veteranları, şəhid ailəsinin üzvləri və cəzaçəkmə müəssisəsindən azad olunan şəxslər sosial müdafiəyə xüsusi ehtiyacı olan və işə düzəlməkdə çətinlik çəkən şəxslərin kateqoriyalarına daxildir.

X.Kərimli vurğuladı ki, bu işçilərin işə götürülməsi Nazirlər Kabinetinin qərarı ilə müəyyənləşir:

“Şirkətlər bu kateqoriyada olan şəxslərdən 5 faizdən çox işə götürməyə məcbur deyil. İşçi sayı 25-50 olan şirkələrdə bu 3 %, 50-100 olan şirkətlərdə 4 %, 100-dən çox olan zaman isə 5 % kvota ayrılır. Bu şəxslər Dövlət Məşğulluq Agentliyinə müraciət etməlidir. Agentlik də həmin işçini şirkətlərə yönləndirməlidir. 

Bundan sonra Dövlət Məşğulluq Agentliyi nəzarət etməlidir ki, şirkət işçilərinin 3-5 faizi bu kateqoriyada olan işçilərdən olsun. Sözügedən məsələdə yəqin ki, Prezident İlham Əliyev Əmək və Əhalinin Sosial Müdafiəsi Nazirliyinin qarşısına bu faizlərin yenidən işlənməsi, dəqiqləşdirilməsi kimi məsələlər qoyub ki, bu, daha effektiv olsun və real vəziyyətə uyğun olsun”.

Ekspert deyir ki, burada bir nüans var, bu kvota bütün şirkətlərə yəni, dövlət orqanlarına, mərkəzi və yerli seçki orqanlarına, elm və təhsil müəssisələrinə, işçilərinin sayı 25 nəfərdən az olan şirkətlərə, hərbi qurumlar Dövlət Təhlükəsizlik Xidməti və s. kimi bəzi qurumlara bu kvota şamil edilmir. 

Əvəz Həsənov