Son dönəmlərdə tez-tez Azərbaycan kəndlərində sel-daşqın xəbərləri eşidirik. Nəticədə evlərə və təsərrüfatlara böyük miqdarda ziyan dəyir. Əvvəllər bu kimi xəbərləri daha çox digər ölkələrdən alırdıq, ancaq indi ölkəmizdə də çoxalıb. Bu halların iqlim dəyişikliyi ilə bağlı olduğu, artıq bizdə də tez-tez rast gəlinə biləcəyi bildirilir. Bu yanaşmalar nə dərəcədə doğrudur?

Bakı Dövlət Universitetinin dosenti Maqsud Babayev valyuta.az-a açıqlamasında bildirdi ki, iqlim dəyişikliyi bütün dünyada gedir, sadəcə Azərbaycanda buna uyğunlaşma problemi var: “Seli, sürüşməni, təbii fəlakətləri qabaqcadan müəyyən edə biləcəyimiz sistem yoxdur. Onu qabaqcadan öyrənən, onu idarə edən orqan olmalıdır. Öncədən xəbər verməlidir ki, sel-daşqın filan vaxtda başlayacaq. Xəbər verildikdən sonra ona hazırlıq olmalıdır. İlin proqnozu verilməlidir ki, sel hadisələrini idarə etmək mümkün olsun. Bizdə hər şeyi gözəyarı edirlər. Bu sistem qurulmalıdır. Hər şeyi iqlim dəyişikliklərinin üstünə yıxmamalıyıq. Çayların üzərində yaz daşqınlarını idarə edən sistemlər yoxdur. Məsələn, su anbarında suyun səviyyəsi 28 metr olmalıdır, 25 metr saxlayırlar. O 3 metr səviyyəni aşağı salan kimi daşqın bütün kəndləri basır”.

Nuray