“Fakt Araşdırıcı-N” MMC-nin direktoru Zeynal Məmmədovun qanunsuz əməlləri barədə Baş prokuror yanında Korrupsiyaya qarşı Mübarizə Baş İdarəsinin “161-Qaynar xətt” əlaqə mərkəzinə daxil olmuş vətəndaş müraciətləri əsasında Cinayət Məcəlləsinin müvafiq maddələri ilə başlanmış cinayət işinin ibtidai istintaqı tamamlanıb.

Bu barədə Valyuta.az-a Baş İdarədən məlumat verilib. 

İbtidai istintaqla müəyyən edilib ki, Zeynal Məmmədov qeyd olunan vəzifədə işləyərkən xidməti vəzifələrinin icrası ilə əlaqədar ona müraciət etmiş ayrı-ayrı şəxslərdən həmin Cəmiyyətdə işə qəbul etmək üçün müxtəlif məbləğlərdə pul vəsaitini rüşvət qismində alıb. 

Eyni zamanda, daha sonra cinayət yolu ilə əldə edilmiş pul vəsaitinin əldə edilməsinin həqiqi mənbəyini gizlətmək məqsədilə məzmununa bilə-bilə yalan məlumatlar daxil etdiyi rəsmi sənədləri təsdiq etməklə vəzifə saxtakarlığına yol verməsi və pul vəsaitlərini leqallaşdırması ilə bağlı əsaslı şübhələr müəyyən edilib. 

İş üzrə toplanmış kifayət qədər sübutlar əsasında Zeynal Məmmədova Cinayət Məcəlləsinin 311.3.2 (rüşvət alma- təkrar törədildikdə), 193-1.2.2 (cinayət yolu ilə əldə edilmiş pul vəsaitlərinin və ya digər əmlakın leqallaşdırılması- təkrar törədildikdə), 193-1.2.3 (cinayət yolu ilə əldə edilmiş pul vəsaitlərinin və ya digər əmlakın leqallaşdırılması- şəxs tərəfindən öz qulluq mövqeyindən istifadə edilməklə törədildikdə) və 313-cü (vəzifə saxtakarlığı) maddələri ilə ittiham elan edilib və cinayət işi baxılması üçün Bakı Ağır Cinayətlər Məhkəməsinə göndərilib.

Ömər Vəzirli