“Azfen” MMC tikinti şirkəti 2023-cü ili 11,5 mln. manat xalis mənfəətlə bitirib. 

Valyuta.az xəbər verir ki, bu, 2022-ci illə müqayisədə 7,1 dəfə və ya 70 mln. manat azalma deməkdir. 

Buna səbəb isə şirkətin gəlirlərinin kəskin azalmasıdır. Nəticədə “Azfen”in vergiyəqədərki mənfəəti 2022-ci illə müqayisədə 7,3 dəfə azalaraq 14,3 milyon manata, mənfəət vergisi ödəmələri isə 8,3 dəfə azalaraq 2,8 milyon manata enib. 

Mənfəətinin kəskinin azalması fonunda şirkət həmçinin, ötən il 14% kiçilib. Belə ki, 2024-cü ilin yanvarın 1-nə “Azfen”in aktivləri 276,57 milyon manat olub. Başqa sözlə, şirkətin cəmi aktivləri bir ildə 45 mln. manat azalıb. 

Dövr üzrə həmçinin, şirkətin öhdəlikləri 3,3 dəfə azalaraq 25,04 milyon manata enib. “Azfen”in balans kapitalı isə əksinə, 4,8 % artaraq 251,5 milyon manata yüksəlib. 

Xatırladaq ki, AZFEN 1996-cı ildə Azərbaycan Respublikası Dövlət Neft Şirkəti (60% pay iştirak) və Tekfen İnşaat və Təsisat A.Ş. (40% iştirak payı) tərəfindən təsis edilmiş aparıcı yerli tikinti şirkətidir. Onun nizamnamə kapitalı 277 min manatdır.

Pünhan