Koronavirusla Mübarizəyə Dəstək Fonduna indiyə qədər 113 milyon 816 min 519 manat vəsait yığılıb. Fonda son ianə keçən ilin may ayının 6-da olub. Yəni bir ildir ki, fonda hər-hansı ianə daxil olmur.

2020-ci ilin 24 martında yaradılan fonda yığılan vəsait hələ xərclənməyib. Xərclənsə belə, fondun rəsmi saytında bu barədə məlumat verilməyib.

Fondun məqsədi koronavirus infeksiyasının Azərbaycanda yayılmasının qarşısını almaq və onunla mübarizə istiqamətində həyata keçirilən tədbirlərə maliyyə dəstəyini təmin etməkdən ibarətdir. Son bir neçə aydır ki, ölkənin epidemioloji durumunda sabitlik müşahidə olunur.

Virusla mübarizə tədbirləri və lazımi maliyyə dəstəyi, demək olar ki, səngiyib. Xarici ölkələrdən vaksin gətirilməsi dayanıb. Xəstəxanalarda ağır durumda olan xəstələrin sayı kəskin azalıb. Bir sözlə, sözügedən fondun fəaliyyətinə zərurət qalmayıb.

Bəs ictimai qurumun aqibəti necə olacaq? Belə fəaliyyətlərin hüquqi proseduru necə həyata keçirilir?

Mövzu ilə bağlı Vəkillər Kollegiyasının üzvü Əsabəli Mustafayev Bizim.Media-ya danışıb.

Onun sözlərinə görə, istənilən ictimai qurum və bu tipli fondlar məqsədinə nail olubsa, sonradan onların fəaliyyətinə zərurət qalmır:

“Adından da görünür ki, həmin fond koronavirusa qarşı mübarizə tədbirlərinin gücləndirilməsi məqsədilə yaradılıb. Əgər məqsədinə nail olubsa, fond öz fəaliyyətinə xitam verməlidir. Sadəcə, ola bilsin ki, məqsədin bir hissəsi dəyişdirilsin. Tutaq ki, nəzəriyyə olaraq xarici ölkələrdə hansısa mübarizəyə dəstək vermək üçün fəaliyyət göstərə bilər. Amma təbii ki, həmin fond ölkə daxilində fəaliyyət göstərmək üçün yaradılıb”.

Vəkil qeyd edib ki, fond öz fəaliyyətinə xitam verəcəksə və büdcəsində xərclənməmiş pul qalacaqsa, o, hansısa ciddi müəssisəyə çevrilə bilər:

“Ya da koronavirusdan əziyyət çəkmiş, vəfat etmiş və ya zərər görmüş şəxslərin ailələri arasında yardım məqsədilə bölünə bilər. Yəqin ki, artıq fondun fəaliyyətinə ehtiyac qalmayacaq. Yaradılmış fond ictimai qurum olduğu üçün onun fəaliyyətinin dayandırılması üçün fərman və qanunun yaradılmasına gərək yoxdur.

Yəni ictimai qurumun yaradılması və ləğv olunmasında hər-hansı hüquqi problem yoxdur. Fondlar adətən müstəqil və özünün müşahidə şurası olur. Ləğvetmə qərarını da elə özləri verməlidirlər”.

Xatırladaq ki, 2020-ci il martın 19-da ölkə başçısı İlham Əliyevin sərəncamı ilə ölkədə əhalinin sağlamlığının qorunması və koronavirus infeksiyasına qarşı mübarizənin gücləndirilməsi məqsədilə Koronavirusla Mübarizəyə Dəstək Fondu yaradılıb və ilkin olaraq Prezidentin Ehtiyat Fondundan 20 milyon manat vəsait ayrılıb.

Fondun fəaliyyətinin şəffaf olması məqsədilə elə həmin il aprelin 11-də İctimai Nəzarət Şurası yaradılıb. Ümumilikdə səkkiz xərc istiqaməti müəyyən edilib.