"İcbari tibbi sığortadan istifadə edən vətəndaş üçün xidmətin məbləği ilə bağlı hər hansı bir limit yoxdur. Yəni sığortalı vətəndaş il ərzində bir dəfə 50 manatlıq xidmətdən də istifadə edə bilər, bir neçə dəfə ümumilikdə 10 minlərlə manatlıq xidmətdən də".

Bunu İcbari Tibbi Sığorta üzrə Dövlət Agentliyinin şöbə müdiri Pərvin Baxşəliyeva "Xəzər Media Mərkəzi"nin əməkdaşları ilə keçirilən maarifləndirmə tədbirində deyib.

Onun sözlərinə görə, vətəndaşa həkim göstərişi varsa, il ərzində ona lazım olan bütün xidmətlərdən limitsiz şəkildə istifadə edə bilər. Sadəcə bəzi xəstəlik və müalicələrdə istisnalar var.

Agentliyin şöbə müdiri Arif Əkbərov isə deyib ki, vətəndaşlar göndəriş almadan da istədikləri xəstəxanaya müraciət edə bilərlər. Ancaq burada müəyyən nüanslar var.

Ümumiyyətlə, vətəndaşlar sığorta əsasında istədikləri həkimi və dövlət xəstəxanasını seçməkdə sərbəstdirlər. Əgər onlara lazım olan xidmət dövlət tibb müəssisəsində yoxdursa, o zaman göndəriş əsasında özəl tibb müəssisələrinə müraciət edə bilərlər. Bu zaman vətəndaş özəl tibb müəssisəsini seçməkdə də sərbəstdir.//Xəzər TV