“İkinci dozadan sonra orqanizmdə koronavirus əleyhinə anticisimləri yaranmayan şəxslərin üçüncü doza alması ilə bağlı məsələ aktiv müzakirə mövzusudur”.

Valyuta.az xəbər verir ki, bunu TƏBİB-in infeksion xəstəliklər üzrə işçi qrupunun həkim-infeksionisti Nəzrin Mustafayeva “COVID-19 və peyvəndlər” mövzusunda çıxışında deyib.

TƏBİB rəsmisi bildirib ki, vaksin istehsalıçısı olan şirkətlər bu məsələ barədə düşünürlər: 

“Amma bu gün üçün bütün dünyada bir vaksinin yalnız iki dozasının qəbulu nəzərdə tutulur”.

O həmçinin vurğulayıb ki, əhali arasında vaksin vurdurduqdan sonra əməl olunmalı qaydalarla bağlı məlumatlar bəzən yanlış olur:  

“Vaksin yerinə su dəyməməsi doğru məlumat deyil. Vaksin vurdurduqdan sonra xüsusi əməl olunmalı hal yoxdur. Peyvənddən sonra çimməmək məsələsi yanlışdır. Sadəcə peyvənddən bir gün öncə və sonra spirtli içkidən uzaq durmaq tövsiyə olunur. Bol maye içmək və ağır fiziki işlərdən çəkinmək lazımdır. İlk 48-72 saat ərzində sadəcə müəyyən simptomlar yaşaya bilərlər. Bu da təbiidir”.