İcbari Tibbi Sığorta üzrə Dövlət Agentliyi tibbi müəssislərində müştərək maliyyələşmə məbləğini  müvəqqəti təxirə salmaqla bağlı hökumətə müraciət edib. 

Bu barədə Valyuta.az-a Agentlikdən məlumat verilib. 

Bildirilib ki, ölkədəki  pandemiya ilə əlaqədar bəzi dövlət səhiyyə müəssisələri koronavirusla mübarizəyə ayrılıb. Həmin tibb müəssisələri hazırda digər tibbi xidmətləri göstərmirlər: 

“Bunu nəzərə alaraq, Agentlik müştərək maliyyələşmə məbləğinin toplanılmasının 2022-ci ilin 1 yanvar tarixinədək təxirə salınması barədə müvafiq dövlət qurumuna müraciət edib”. 

Xatırladaq ki, “Tibbi sığorta haqqında” Qanuna əsasən müştərək maliyyələşmə məbləğinin ödənilməsi ilkin səhiyyə xidmətinə müraciət etmədən birbaşa ambulator-poliklinik, laborator, funksional-diaqnostik tibbi xidmətlərdən istifadə etdikdə, eləcə də vətəndaşın yönləndirildiyi tibbi ərazi bölməsindən kənar yerləşən dövlət tibb müəssisəsinə müraciət olunduqda tətbiq edilir.

Başqa sözlə, ailə həkiminə getmədən birbaşa xəstəxanaya üz tutan vətəndaşlar tibbi xidmət almaq üçün müəyyən məbləğ ödəməlidir. Həmin məbləğlər xəstəxananın Tibbi Ərazi Bölməsinin əhatə dairəsində olub-olmamasından asılı olaraq 15-90 manat arasında dəyişir. 

Onu da deyək ki, 1 aprel 2021-ci il tarixindən etibarən icbari tibbi sığorta bütün ölkə əhalisini əhatə edəcək. Belə ki, Bakı və Sumqayıt şəhərlərində, Abşeron rayonunda rəsmi qeydiyyatda olan əhali də icbari tibbi sığortanın Xidmətlər Zərfinə daxil olan 2550 sayda tibbi xidmətdən istifadə edəcək.

Zeynəb Vəkil