İndiyədək işğaldan azad edilən 8 rayon üzrə 102 yaşayış məntəqəsində inventarlaşma işləri yekunlaşıb. 11 yaşayış məntəqəsi üzrə işlər davam etdirilir. 

Valyuta.az xəbər verir ki, bu barədə Əmlak Məsələləri Dövlət Xidməti yanında Torpaqların Dövlət İdarəetməsinin Təşkili üzrə Dövlət Agentliyinin direktor müavini Şamil Abdullayev məlumat verib. 

Onun sözlərinə görə, 8 rayon üzrə 273 yaşayış məntəqəsinin tamamilə dağıdılıb yararsız hala gətirildiyi müəyyən edilib: “İşğaldan azad olunmuş ərazilərdə infrastruktur obyektlərinin, torpaq sahələrinin və digər daşınmaz əmlakın ilkin inventarlaşdırılması işinin təşkili məqsədilə Əmlak Məsələləri Dövlət Xidməti tərəfindən Gəncə şəhərində və Füzuli rayonunun Horadiz qəsəbəsində yerli qərargahlar yaradılıb. İnventarlaşdırma nəticəsində əldə ediləcək məlumatların kameral qaydada işlənməsinin təmin edilməsi üçün Bakı şəhərində mərkəzi qərargah da qurulub. Ötən müddət ərzində işğaldan azad edilmiş rayonlardan 8-i üzrə ümumilikdə, 8 618 əmlakın  çöl inventarlaşma işləri tamamlanıb. Onlardan 6 911-i daşınmaz əmlak, 1 707 ədədi isə infrastruktur obyektidir”.

Ş.Abdullayev əlavə edib ki, həmin rayonlarda infrastruktur obyektləri üzrə 299 km avtomobil yolunun, 115 km elektrik verilişi xəttinin, 35,8 km qaz təchizatı xəttinin, 3 km su təchizatı xəttinin, 31,3 km suvarma şəbəkəsinin və 171.653 ha torpaq sahəsinin inventarlaşdırılması işləri başa çatdırılıb: “Qarşımızda duran əsas vəzifələr torpaqların elektron kadastr və kəmiyyət uçotu işlərinin aparılması, torpaqların uqodiyasına (təsərrüfat yerinə), məqsədli təyinatına və hüquqi rejiminə uyğun kadastr məlumat bazasının yaradılması, torpağın keyfiyyətinin yoxlanılması və s. işlərdir”.

Zeynəb Vəkil
Valyuta.az