Ərazisi 125 kvadrat kilometri əhatə edən Gəncə şəhərinin əhalisi 1 yanvar 2021-ci il vəziyyətinə 335 min 802 nəfər təşkil edib.

Gəncə Şəhər Statistika İdarəsindən Valyuta.az-a verilən məlumata görə, onların 152 min 997 nəfəri Nizami rayonunda, 182 min 805 nəfəri isə Kəpəz rayonunda yaşayır. Əhalinin 163 min 887 nəfəri kişilərdən, 171 min 915 nəfəri qadınlardan ibarətdir.

2020-ci ildə şəhərdə 2975 körpə doğulub, 37 nəfəri 1 yaşadək uşaq olmaqla 2913 nəfər isə dünyasını dəyişib. Təbii artım (doğum-ölüm) il ərzində 62  nəfər olub.

Ötən il həmçinin 470 nəfərin şəhərə gəlməsi, 313 nəfərin isə şəhərdən getməsi qeyd olunduğu üçün miqrasiya saldosu (gəlmə-getmə) müsbət 157 olub.

2020-ci ildə şəhərdə 885 nigah bağlanılıb, 597 boşanma aktı qeydiyyata alınıb.