Sahibkarları maraqlandıran məsələlərdən biri də gəlirdən çıxılan xərclərin dəqiq çərçivələridir. Bununla bağlı suallar hər zaman aktualdır. 

Valyuta.Az konkret misal üzərində cavabı araşdırıb. Tutaq ki, şirkətin əməkdaşı xarici ölkəyə ezam olunub. Həmin şəxs öz adına olan bank kartından qeyri-rezident aviaşirkətə ödəniş edərək aviabilet əldə edib. Sonra həmin məbləği şirkət ona ödəyib. Belə olan halda şirkətin adına heç bir ödəniş sənədi (invoys) olmur. Bəs şirkət həmin aviabiletin dəyərini mənfəət vergisi hesablanan zaman xərclərə aid edə bilərmi ? Bundan əlavə, qeyri-rezidentdən alınan aviabiletin dəyəri ödəmə mənbəyində vergiyə cəlb olunmalıdırmı?

Suallara İqtisadiyyat Nazirliyi yanında Dövlət Vergi Xidmətindən aydınlıq gətirilib. 

Bildirilib ki, Vergi Məcəlləsinin 108-ci maddəsinin müddəalarına əsasən, Məcəllənin X fəslinə uyğun olaraq gəlirdən çıxılmayan xərclərdən başqa gəlirin əldə edilməsi ilə bağlı olan bütün xərclər, həmçinin qanunla nəzərdə tutulmuş icbari ödənişlər gəlirdən çıxılır.

Eyni zamanda işəgötürən tərəfindən ezamiyyəyə göndərilən işçinin ezamiyyə xərclərinin ödənilməsi qaydası Azərbaycan Respublikası Maliyyə Nazirliyinin Kollegiyasının 18 yanvar 2012-cı il tarixli Q-01 nömrəli Qərarı ilə təsdiq edilən və Azərbaycan Respublikasının Hüquqi Aktların Dövlət Reyestrinə 30 yanvar 2012-ci il tarixli 15201201180001 nömrə ilə daxil edilən “İşçilərin Ezamiyyə Qaydaları” ilə tənzimlənir.

Həmin Qərara əsasən, nəqliyyat xərclərinə - ezam olunma yerinə getmək və qayıtmaq, ölkədaxili nəqliyyat xərcləri (taksidən istifadə istisna olmaqla, yaşayış məntəqəsindən kənarda yerləşən vağzala, limana (bərəyə), təyyarə meydanına və ölkə ərazisində digər məntəqələrə getmək) daxildir və bu xərclər təqdim edilən sənədlər əsasında ödənilir.

Yuxarıda qeyd olunan hallara əsasən, şirkət tərəfindən sahibkarlıq fəaliyyəti ilə bağlı xarici ölkələrə ezamiyyələr zamanı Azərbaycan Respublikasının Nazirlər Kabinetinin 25.01.2008-ci il tarixli 14 nömrəli Qərarı ilə müəyyən edilən norma daxilində işçilərə ödənilən ezamiyyə xərcləri, habelə işçinin ezam olunma yerinə getmək və qayıtmaq xərclərini təsdiq edən sənədlər əsasında işçiyə ödənilən nəqliyyat xərcləri gəlirdən çıxılan xərclərə aid edilir.

Əlavə olaraq ölkədaxili və xarici ölkələrə ezamiyyə xərclərinin 1 günlük normaları Azərbaycan Respublikası Nazirlər Kabinetinin 2008-ci il 25 yanvar tarixli 14 nömrəli “Ezamiyyə xərclərinin normaları haqqında” Qərarı ilə müəyyən edilib.

Aviabiletin ödəmə mənbəyində vergiyə cəlb edilməsinə gəlincə, DVX-dən bildirilib ki, qeyri-rezidentə ödənilən aviabiletlərin dəyəri Azərbaycan mənbəyində gəlir olmadığı üçün ödəmə mənbəyində vergiyə cəlb edilmir.