400 min manatlıq ticarət obyekti yanan xanım sahibkar Həcər Dibirova məhkəməyə müraciət edib. Sahibkar hadisədən 7 aydan artıq vaxt keçməsinə baxmayaraq zərərçəkmiş kimi tanınmadığını deyir.

Yanğın hadisəsi 2020-ci il iyulun 13-də Balakən rayonu, Meşəşambul kəndində baş verib.

Avtoyuma sexi, avtotəmir sexi, ət satışı mağazası, tikinti materialları anbarı, taxıl məmulatları anbarı, bərbərxana, kafe, çörək bişirmə sexi, məişət avadanlıqları satışı mağazası, qonaq otağı, ofis otağı, market, tennis və bilyard oyunu otağı və anbar sahəsindən ibarət olan ticarət obyekti tamamilə yanıb.

Yanğın zamanı tikinti üzrə 106 380 manat, əmtəə üzrə isə 300 000 manat maddi ziyan müəyyən edilib.

Zərərçəkmiş H.Dibirova bildirir ki, Fövqəladə Hallar Nazirliyinin tərtib etdiyi aktda yanğına elektrik xətlərində yaranmış qısaqapanmanın səbəb olduğu qeyd edilib.

Ədliyyə Nazirliyi Məhkəmə Ekspertizası Mərkəzinin məhkəmə tikinti-texniki ekspertizasının 23 oktyabr 2020-ci il tarixli rəyinə əsasən yanğın zamanı yaranmış qüsurların aradan qaldırılması üçün görülməli təmir-bərpa işlərinin dəyəri 106 380,50 manatdır.

H.Dibirova müraciətində qeyd edib ki, FHN müstəntiqləri istintaqın nəticəsində qənaətə gəlib ki, bu yanğın hadisəsində Cinayət Məcəlləsinin 314-cü maddəsi ilə nəzərdə tutulmuş səhlənkarlıq cinayətinin tərkib əlamətləri var.

Bu maddə ilə nəzərdə tutulmuş cinayətlərə dair işlər üzrə ibtidai istintaq prokurorluq orqanları tərəfindən aparılır. Buna görə də materiallar Balakən rayon prokurorluğuna göndərilməsi üçün Baş Prokurorluğa təqdim edilib.

Balakən rayon prokuroru baş vermiş hadisə üzrə cinayət haqqında ərizəni qəbul etmədiyi üçün sahibkar məhkəməyə müraciət edib. //Musavat.com