Bakı şəhərində aparılan tikinti işlərinin 65 faizi paytaxtın cəmi 4 rayonun payına düşür. Bakı Şəhər Statistika İdarəsinin məlumatına əsasən, 2020-ci ildə paytaxtda 7,324 milyard manatlıq inşaat işləri həyata keçirilib və bu işlərin 4,726 milyard manatı və ya 65 faizi Nəsimi, Yasamal, Xətai və Nərimanov rayonlarında aparılıb.
 
Valyuta.az bildirir ki, adıçəkilən rayonlar ərazisinə görə Bakının böyük rayonları sayılmır. Xətai, Nəsimi, Nərimanov və Yasamal ərazisi kiçik olan rayonlardandır. Yasamal rayonunun ərazisi 20 kv. km, Xətai rayonunun ərazisi 31,2 kv. km, Nəsimi rayonunun ərazisi 10 kv. km, Nərimanov rayonunun ərazisi 24,5 kv. km-dir. Bu rayonların əraziləri paytaxtın ümumi ərazisinin (2200 kv km) 3,9 faizini təşkil edir. Ərazisinə görə Bakının ən böyük rayonu olan Qaradağı (1001 kv km) nəzərə almasaq, adıçəkilən 4 rayonun torpaq payı yenə də olduqca azdır (paytaxtın 7,14 faizi).
 
Ərazi az olsa da bu rayonların əhalisi çoxdur. Xətai, Yasamal, Nəsimi Bakıda əhalisinin sayı ən çox olan rayonlardır. Əhali sayının çoxluğu və ərazinin kiçik olması həmin ərazilərdə çoxlu sayda yaşayış binasının tikinsinə əsas yaratmır. Çünki ərazinin kiçik, əhalinin sayının çox olması həmin rayonlarda əhali sıxlığının artmasına gətirib çıxarıb. Nəsimidə 1 kvadrat kilometrə 22200 nəfər, Yasamalda 12400 nəfər, Xətaidə 9200 nəfər, Nərimanov rayonunda 7100 nəfər məskunlaşıb.
 
Amma Bakıda elə rayonlar var ki, orada həm əhali məskunlaşması sıx deyil, həm də ərazi genişdir. Buna misal kimi Qaradağ (1 kv. km, 108 nəfər), Xəzər (1 kv. km, 500 nəfər), Sabunçu (1 kv. km, 1050 nəfər) rayonlarını göstərmək olar.