Blogerlik fəaliyyəti 2025-ci ildə də sürətlə inkişaf edir və bir çox ölkədə bu sahə rəqəmsal iqtisadiyyatın əsas hissəsinə çevrilib. Blogerlər kontent yaradaraq reklam, sponsorluq və məhsul satışları kimi vasitələrlə gəlir əldə edirlər.

Valyuta.az xəbər verir ki, bu gəlirin həcmi yaşanılan ölkəyə, kontentin dəyərinə və auditoriyanın ölçüsünə görə fərqlənir.

Amerika Birləşmiş Ştatlarında blogerlər digər ölkələrlə müqayisədə daha yüksək qazanc əldə edirlər. Bu ölkədə blogerlərin illik orta gəliri təxminən 103,446 ABŞ dollarıdır (təxminən 175,858 manat), bu isə aylıq 8,620 ABŞ dolları (təxminən 14,650 manat) deməkdir. ABŞ-da reklam bazarının genişliyi və yüksək auditoriya imkanları blogerlik fəaliyyətini daha gəlirli edir.

Kanadada blogerlərin illik qazancı 60,994 ilə 82,950 ABŞ dolları (təxminən 103,689 – 141,015 manat) arasında dəyişir. Bu rəqəmlər aylıq olaraq 5,083-dən 6,916 ABŞ dollarına (təxminən 8,641 – 11,757 manat) qədər yüksəlir. Kanada bazarında da rəqəmsal kontentə maraq artdığından blogerlərin qazancı sabit artım göstərir.

Avstraliyada blogerlər illik ortalama 57,000 ABŞ dolları (təxminən 96,900 manat) qazanırlar ki, bu da aylıq 4,750 ABŞ dollarına (təxminən 8,075 manat) bərabərdir.

Böyük Britaniyada isə illik orta gəlir 50,000 ABŞ dolları (təxminən 85,000 manat) təşkil edir. Bu göstərici aylıq olaraq 4,167 ABŞ dollarına (təxminən 7,083 manat) uyğun gəlir.

Hindistanda blogerlik gəlirləri daha aşağı səviyyədədir. Burada blogerlərin illik orta qazancı təxminən 10,000 ABŞ dollarıdır (təxminən 17,000 manat), yəni aylıq olaraq 833 ABŞ dolları (təxminən 1,416 manat).

Azərbaycanda isə blogerlərin gəliri daha geniş diapazonda dəyişir. Orta səviyyəli blogerlər illik olaraq 5,000-dən 20,000 ABŞ dollarına (təxminən 8,500 – 34,000 manat) qədər gəlir əldə edirlər. Bu da ayda təxminən 417-dən 1,667 ABŞ dollarına (təxminən 709 – 2,834 manat) qədər dəyişir. Ölkədə blogerlik sahəsində inkişaf potensialı mövcuddur və bu sahəyə maraq ildən-ilə artır.

Maya Hüseynova