2025-ci ilin ilk rübündə ən çox satılan ağıllı telefon “iPhone 16” olub.

Valyuta.az xəbər verir ki, “Counterpoint Research” şirkətinin məlumatına əsasən, “Apple” 2025-ci ilin ilk rübündə ağıllı telefon satışlarında lider mövqeyini qoruyub. 

Satış siyahısının ilk dörd pilləsində “iPhone” modelləri qərarlaşaraq, ən çox satılan cihaz “iPhone 16” olub. Bu modeli “iPhone 16 Pro Max”, “iPhone 16 Pro” və ötən ilin cihazı olan “iPhone 15” izləyib.

Tədqiqatçılar bildirir ki, “Apple”ın standart və “Pro” seriyaları arasındakı fərqləri azaltması bu uğura səbəb olub..

“Apple” yalnız ilk dörd modellə deyil, həm də “iPhone 16 Plus” modeli ilə ilk onluğa daxil olmağa nail olub. Beləliklə, şirkət ümumilikdə beş modeli ilə siyahıda yer alaraq, ötən ilin lideri “iPhone 15 Pro Max”dən sonra “iPhone 16” ilə standart modelə yenidən liderliyi qazandırıb.

Siyahının beşinci pilləsində “Samsung”un “Galaxy A16 5G” modeli yer alıb. Cənubi Koreya istehsalçısının flaqman modeli olan “Galaxy S25 Ultra” yeddinci, “Galaxy A06” altıncı, “Galaxy A55 5G” isə doqquzuncu sırada qərarlaşıb. “Xiaomi” şirkəti isə yalnız “Redmi 14C” modeli ilə səkkizinci pillədən siyahıya daxil ola bilib.

“iPhone 16” xüsusilə Yaponiya, Orta Şərq və Afrika bölgələrində güclü satış göstəriciləri ilə seçilib. Çin bazarında isə hökumət dəstəyi ilə təqdim edilən subsidiyalar və “Huawei” kimi yerli markalarla yaşanan rəqabət “Apple”ın “Pro” seriyasının performansına müəyyən qədər mənfi təsir göstərib.

Sərvanə Rəmixanova