Hər kəs daha yaxşı maliyyə vəziyyətində olmaq istəyir, amma bu təkcə gəlirin miqdarından deyil, həm də pulla necə davranmağınızdan asılıdır. 

Valyuta.az xəbər verir ki, "Business Insider" nəşrinə danışan sertifikatlı maliyyə planlaşdırıcısı Keyt Norris gəliri az olan insanların belə qənaət edə bilməsi üçün dörd əsas prinsip açıqlayıb.

1. Əvvəlcə özünüzə maaş ödəyin

Hər dəfə maaş aldığınızda ilk olaraq bir hissəsini ehtiyat üçün ayırın. Bu, sonradan qalan pulla istədiyiniz kimi davranmağınıza şərait yaradacaq. Müasir bank tətbiqlərində avtomatik olaraq müəyyən məbləğin ayrı hesaba köçürülməsini qurmaq mümkündür. Əgər istəsəniz, bu prosesi əl ilə də yerinə yetirə bilərsiniz.

"Pul hesabınızdan çıxan kimi onu xərcləmək ehtimalınız azalır", deyə Keyt Norris bildirir.

2. Büdcənizə nəzarət edin

Pul çatışmazlığı çox zaman düzgün xərcləmə vərdişlərinin olmaması ilə bağlıdır. Nə qədər pul qazandığınızdan daha vacibi – onu necə xərclədiyinizdir. Büdcə planı hazırlayaraq, xərclərinizi izləmək ilk addım ola bilər.

Norris tövsiyə edir ki, ilkin olaraq əsas xərcləri (məsələn, ərzaq, kommunal, nəqliyyat) müəyyənləşdirin və yalnız ondan sonra əlavə xərcləri planlaşdırın. Bu, sizə artıq qalan və qənaətə yönləndirilə biləcək məbləği görməyə imkan verəcək.

3. İstehlak kreditlərindən uzaq durun

Kreditlə nəsə almaq - bir çox hallarda əlavə ödənişlər və faizlərlə pul itkisinə səbəb olur. Norris deyir ki, insanlar çox vaxt kreditlərin nə qədər baha başa gəldiyini anlamırlar.

Ona görə də hər hansı bir kredit götürməzdən əvvəl yalnız aylıq ödənişə deyil, ümumi geri qaytarılacaq məbləğə baxmağı məsləhət görür.

4. Azdan başlayın

Gəliriniz çox olmasa belə, qənaət etməyə indi başlamaq vacibdir. Norris bildirir ki, hər ay cüzi məbləğ ayırmaq belə, uzunmüddətli qənaət vərdişi formalaşdırır. Bu yolla zamanla "qara gün" üçün maliyyə yastığı yarana və hətta kiçik investisiya kapitalına çevrilə bilər.

Paşa Məmmədli