"Hazırda İnsan Resursları (HR) sahəsində bir sıra çağırışlar mövcuddur. Pandemiyadan sonrakı dövrdə bu çağırışların əsas istiqaməti işçilərin rifah səviyyəsinin yüksəldilməsi ilə bağlıdır".

Bu fikirləri Beynəlxalq İnsan Resursları Sammiti 2025-in Təşkilat Komitəsinin Sədri, Azərbaycan HR İnstitutunun təsisçisi və direktoru Emil Hüseynov bu gün keçirilən “International HR Summit 2025” tədbirində səsləndirib.

E.Hüseynov bildirib ki, şirkətlər son dövrlərdə işə bağlılıq məsələsində müəyyən çətinliklərlə üzləşiblər və insan resursları sahəsində əsas məqsəd bu funksiyanı dəyər yaradan bir istiqamətə çevirməkdir: “HR artıq sadəcə inzibati bir struktur olmaqdan çıxmalı, işçilərin rifahına, təşkilati və korporativ mədəniyyətin formalaşmasına, vahid dəyərlər əsasında mədəniyyətin qurulmasına dəstək göstərməlidir”.

O əlavə edib ki, hazırda dünyada insan resursları sahəsində müxtəlif çətinliklər yaşanır və onların ən qlobalı istedadların, talantların qorunub saxlanılması məsələsidir: “Bu kontekstdə keçirilən bugünkü tədbirdə üç ayrı paneldə aktual mövzular müzakirə ediləcək. Mövzular sırasında süni intellekt, gələcəyin HR hədəfləri və HR-da liderlik kimi başlıqlar yer alır.

Müzakirələrin sonunda əldə olunan nəticələr insan resursları sahəsində çalışan həmkarlarla paylaşılacaq".

Sərvanə Rəmixanova