Son bir il ərzində dünyanın müxtəlif ölkələrində kriptovalyuta sahiblərinin onlarla dəfə oğurlanması halları baş verib. Təkcə Fransada son aylar ərzində azı beş belə hadisə qeydə alınıb.

Valyuta.az xəbər verir ki, bu barədə "The Wall Street Journal" (WSJ) yazıb.

Hücumların artması səbəbindən kriptovalyuta sahibləri şəxsi həyatlarını qorumaq üçün sosial şəbəkələrdəki profillərini gizlədir və ailə ünvanlarını internetdən silməyə çalışırlar.

Nəşrin verdiyi məlumata görə, ən son hadisə ötən həftə Parisdə baş verib. "Paymium" adlı kriptobirjanın rəhbərinin qızı və onun azyaşlı övladı qara maskalı üç şəxs tərəfindən oğurlanmağa cəhd edilib. Qadının həyat yoldaşı və qonşularının müdaxiləsi nəticəsində cinayətkarlar hadisə yerindən qaçıblar. Hadisə zamanı qadının əri yaralanıb.

Cinayətkarların planlarını həyata keçirdiyi hallar da olub. Məsələn, yanvar ayında Fransada kriptovalyuta cüzdanları ilə tanınan "Ledger" şirkətinin həmtəsisçisi David Ballan oğurlanıb. Cinayətkarlar ondan 10 milyon avro tələb ediblər və təzyiq məqsədilə bir barmağını kəsiblər. Şirkət ilkin olaraq 3 milyon avro köçürüb, lakin vəsaitin böyük hissəsi kriptovalyutanın dondurulması ilə geri qaytarılıb.

May ayında isə Mərakeş əsilli bir kriptosahibkarın atası Parisdə it gəzdirərkən oğurlanıb və onun da barmağı kəsilib. Hadisə ilə bağlı 18–26 yaş arasında bir neçə nəfər saxlanılıb.

WSJ-nin məlumatlarına paralel olaraq, ötən həftə "Bloomberg" kriptobirja "Binance"in haker hücumuna məruz qaldığını bildirmişdi. Hücum zamanı hakerlər birjanın əməkdaşlarına rüşvət təklif edərək şəxsi məlumatlara çıxış əldə etməyə çalışıblar. Eyni zamanda, rəqəmsal valyuta mübadiləsi platforması "Kraken"in də hücuma məruz qaldığı qeyd olunub.

Paşa Məmmədli