5G texnologiyası insanlar üçün təhlükəlidirmi? Avropada fəallar niyə 5G antenlərini sabotaj edirlər? Bu sualların cavabı yeni elmi tədqiqatda gizlənir.

Valyuta.az xəbər verir ki, pandemiya dövründə müxtəlif konspirasiya nəzəriyyələrinin mərkəzində olan 5G texnologiyasının insan sağlamlığı üçün təhlükə yaratdığına dair heç bir elmi sübutun olmadığı aparılan yeni bir araşdırma ilə bir daha təsdiqlənib.

Alimlər ictimaiyyətdəki şübhələri "tamamilə elmi məlumatlarla aradan qaldırmaq" məqsədilə insan dərisi hüceyrələrini yüksək güclü 5G dalğalarına məruz qoyublar. Araşdırmanın nəticələrinə əsasən, icazə verilən səviyyələrdəki 5G siqnalları insan dərisinə zərər vermir.

Almaniyadakı Konstruktor Universitetinin alimləri tərəfindən aparılan araşdırma "PNAS Nexus" adlı elmi jurnalda dərc edilib. Təcrübədə iki müxtəlif insan dərisi hüceyrəsi növü, normal təhlükəsizlik sərhədlərindən xeyli yüksək səviyyədəki 5G elektromaqnit dalğalarına 2 və 48 saat ərzində məruz qalıb. Nəticələr göstərib ki, bu dalğalar hüceyrə quruluşunda pozuntu və ya zədələnmə yaratmayıb.

Mobil telefonlar, Wi-Fi və digər rabitə texnologiyaları məlumat ötürmək üçün elektromaqnit dalğalardan istifadə edir. Bu dalğalar müəyyən tezlik aralıqlarında fəaliyyət göstərir. 4G texnologiyasında tezlik sıxlığı və sürət məhdudiyyətləri səbəbilə, daha geniş tezliklərdən istifadə edən 5G texnologiyası 2018-ci ildən tətbiq olunmağa başlayıb.

Hazırda 5G şəbəkələri 6 GHz-dən aşağı tezliklərdə çalışır. Gələcəkdə isə bu sərhədin 24,3 – 43,3 GHz aralığına qədər yüksəldilməsi planlaşdırılır. Bu tezliklər təhlükəli görünsə də, elektromaqnit dalğalarının toxumalara nüfuzetmə dərinliyi tezlik artdıqca azalır. Məsələn, 3 GHz-dən aşağı tezlikli dalğalar dərinin maksimum 10 mm dərinliyinə qədər nüfuz edə bilir. 10 GHz üzərindəki dalğalar isə yalnız 1 mm dərinə keçə bilir. Buna görə də, yüksək tezlikli 5G dalğalarının təsiri yalnız dərinin səthi ilə məhdudlaşır.

Bu araşdırma, 5G texnologiyası ilə bağlı şübhələri aradan qaldıra biləcək mühüm addım kimi qiymətləndirilir. Lakin müxtəlif elmi qrupların aparacağı əlavə tədqiqatlarla yeni nəticələrin ortaya çıxıb-çıxmayacağı gələcəkdə aydın olacaq.

Paşa Məmmədli