Bakıda avtoyuma məntəqəsindəki maşından 6200 manat oğurlayan şəxs cinayət məsuliyyətinə cəlb edilib.

Valyuta.az xəbər verir ki, 36 yaşlı Müşfiq Səbail rayonunda fəaliyyət göstərən avtoyuma məntəqəsindəki işinin ilk günündə oğurluq edib.

Belə ki, Müşfiq avtoyuma məntəqəsinin yanından keçəndə oranı işlədən Vüsal adlı şəxs ona işçi axtardığını deyib. Müşfiqə kömək etməsini təklif edib.

Müşfiq bu təkliflə razılaşaraq “Hyundai” markalı maşını yumağa başlayıb. O, maşının salonunda olan 6200 manatı görüb. Pulu iki hissəyə bölərək ciblərinə qoyub. Təcili işi çıxdığını deyərək oradan uzaqlaşıb.

Müşfiqin dediyinə görə, yolda olan zaman pulun bir hissəsini itirib. O, cibində qalan pulu sayanda 2700 manat olduğunu görüb. Sonra yaşadığı Salyan rayonuna gedib.

Bir neçə gün əmisigildə qaldıqdan sonra Bakı şəhərinə qayıdıb. Suraxanı rayonunda işə düzəlib. Müşfiq pulun 250 manatına telefon alıb, bibisi nəvəsinin oxuduğu universitetin təhsil haqqına 700 manat verib, 300 manat məbləğində özünə geyim alıb. Pulun 500-600 manatını da internet vasitəsi ilə kazinoda uduzub. Qalan hissəsini isə öz tələbatına xərcləyib.

Əməlindən peşman olduğunu deyən Müşfiq zərərçəkmiş şəxslə barışdığını, zərərin ödənildiyini deyib.

Məhkəmənin hökmü ilə Müşfiq 2 il azadlıqdan məhrum edlib. Cinayət Məcəlləsinin 70-ci (şərti) maddəsi tətbiq edilməklə cəzası şərti hesab olunub.

Mənbə: Musavat.com