ABŞ administrasiyası dünyadakı şirkətlərə Çinin "Huawei" istehsalı olan süni intellekt (Sİ) prosessorlarından istifadə etməmək barədə tövsiyə ilə çıxış edib. 

Valyuta.az "Financial Times"a istinadən xəbər verir ki, bu cür komponentlərdən ABŞ xaricində istifadə olunması Amerika ixrac nəzarətinin pozulması kimi qiymətləndirilə bilər və bu, cinayət məsuliyyətinə səbəb ola bilər.

ABŞ Ticarət Nazirliyinin açıqlamasına əsasən, "Huawei"nin "Ascend" seriyalı prosessorları ixrac nəzarətinə tabedir. Buna səbəb onların Amerika texnologiyalarını ehtiva etməsi və ya həmin texnologiyalarla istehsal olunması ehtimalıdır.

Ticarət Nazirliyi nəzdində fəaliyyət göstərən Sənaye və Təhlükəsizlik Bürosu (BIS) xarici süni intellekt çiplərinə dair qaydaların sərtləşdirildiyini bildirib. Belə ki, "Huawei Ascend" çiplərindən ABŞ xaricində istifadə açıq şəkildə ixrac nəzarəti qaydalarının pozulması kimi qiymətləndiriləcək. Söhbət üç modeldən - "Ascend" 910B, 910C və 910D çiplərindən gedir. Büroya görə, bu modellər ya müəyyən ABŞ proqram təminatı və ya texnologiyalarından istifadə edilərək hazırlanıb, ya da birbaşa həmin texnologiyalar əsasında yaradılmış avadanlıqda istehsal olunub.

Bu xəbərdarlıq Vaşinqtonun "Huawei"nin süni intellekt sahəsində – xüsusilə mikrosxemlər istehsalında – sürətlə irəliləməsi ilə bağlı artan narahatlığı fonunda səsləndirilib. “Financial Times” yazır ki, Çin şirkəti artıq öz müştərilərinə İT klasterləri şəklində süni intellekt çiplərini təqdim etməyə başlayıb və bu çiplər əsas göstəricilər – ümumi hesablama gücü və yaddaş həcmi – baxımından aparıcı Amerika istehsalçısı "Nvidia"nın məhsullarını geridə qoyur.

ABŞ hakimiyyəti "Huawei"nin yaxın vaxtlarda beynəlxalq bazarda "Nvidia" və digər amerikalı istehsalçılarla rəqabət aparmağa qadir Sİ prosessorlarını təqdim etməyə başlayacağından narahatdır.

Paşa Məmmədli