Banklar, dələduzluq hallarından müştəriləri qorumaq məqsədilə dondurulmuş hesabların açılması üçün vətəndaşlardan qohumları ilə birlikdə ofisə gəlmələrini tələb etməyə başlayıb.

Valyuta.az bu barədə "İzvestiya" qəzetinə istinadla məlumat verir.

"Alfa-bank"ın müştərisi, Moskva sakini Anjela məqsədsiz kredit rəsmiləşdirib və vəsaiti başqa hesaba köçürməyə cəhd edib. Lakin bank kreditlə bağlı suallardan sonra əməliyyatı dayandırıb və onun hesabına çıxışı dondurub. Hesabın yenidən aktivləşdirilməsi üçün o, filialda oğlunun iştirakı ilə müraciət etməli olub.

"Maliyyə savadlılığının inkişafı assosiasiyası" bu cür halların - yəni hesabların dələduzluqdan qorunmaq məqsədilə bloklanmasının - mövcud olduğunu təsdiqləyib. Ekspert Pavel Nikitin bildirib ki, bu tədbirlər müəyyən hallarda, xüsusən də pensiya yaşlı müştərilər üçün əsaslı ola bilər.

Hüquqşünas İlya Vasilçukun sözlərinə görə, son vaxtlar kredit təşkilatları müştərinin iradəsinin sərbəstliyini yoxlamaq məqsədilə yaxın qohumla birlikdə ofisə gəlməyi tələb etməyə başlayıblar.

"Akkademiya Konstanta"nın təsisçisi Polina Lebedeva isə bu addımı "anti-fraud" (dələduzluğa qarşı) tədbirlərin tətbiqində ifrat hal kimi qiymətləndirib. Ekspert qeyd edib ki, banklar, yəqin ki, məsuliyyətdən yayınmaq məqsədilə həddindən artıq təşəbbüskarlıq göstərir və müəyyən olunmuş çərçivədən kənara çıxan tədbirlər görürlər. O əlavə edib ki, heç bir qanun kredit təşkilatlarına müştəridən qohumunu özü ilə gətirməyi tələb etmək hüququ vermir.

Maya Hüseynova