"Alphabet" şirkətinin baş direktoru Sundar Piçai "Waymo"nun uzunmüddətli planlarına fərdi avtomobil satışlarının da daxil olduğunu açıqlayıb. Şirkət təkcə tərəfdaşlıqlar vasitəsilə deyil, birbaşa istehlakçıya çatmaqla böyüməyi hədəfləyir.

Valyuta.az xəbər verir ki, Sundar Piçai gəlir hesabatı zamanı "Waymo"nun gələcək biznes modeli ilə bağlı verilən sualları cavablandırarkən, şirkətin yalnız əməkdaşlıqlarla deyil, həm də fərdi satışlarla böyümə potensialına malik olduğunu bildirib.

Hazırda "Waymo" Mayamidə "Moove", Ostində və tezliklə Atlantada "Uber" ilə əməkdaşlıqlarını genişləndirməyi planlaşdırır. Lakin Piçai bu planların da fövqündə olaraq "gələcəkdə şəxsi mülkiyyət üçün müxtəlif seçimlərin" təqdim oluna biləcəyini vurğulayıb.

Əslində "Waymo"nun fərdi istifadəçilər üçün avtonom nəqliyyat vasitələri satmaq ideyası yeni deyil. Şirkət 2018-ci ildə "Chrysler" ilə əməkdaşlıq çərçivəsində avtonom "Pacifica" minivenlərinin istehsalına başlamış və bu nəqliyyat vasitələrinin fərdi müştərilərə satılmasını gündəmə gətirmişdi. Lakin həmin dövrdə bu planlar geniş şəkildə reallaşdırıla bilməmişdi.

Fərdi avtonom avtomobil satışına dair bu vizyon təkcə "Waymo"ya aid deyil. "Tesla"nın baş direktoru İlon Mask ötən il keçirilən "We, Robot" tədbirində istehlakçıların 2026-cı ilə qədər təxminən 30.000 ABŞ dollarına bir "Cybercab" əldə edə biləcəklərini bildirmişdi. Mask "Tesla"nın son gəlir hesabatında isə "Waymo"nun istehsal etdiyi robotaksilərin "Cybercab"lə müqayisədə “xeyli bahalı” olduğunu iddia edib. "Tesla"nın iki nəfərlik, sükan dəstəyi olmayan robotaksisi yalnız kamera görüntüsü texnologiyasından istifadə edərkən, "Waymo"nun nəqliyyat vasitələri əsasən "lidar" olmaqla daha mürəkkəb sensor sistemləri ilə təchiz olunub. Hazırda "Waymo" beş nəfərlik "Jaguar I-Pace EV" modellərindən istifadə edir və geniş texniki baza ilə işləyir.

Maskın maliyyətlə bağlı tənqidlərinə baxmayaraq, real dünya şəraitində fəaliyyət göstərən robotaksilər sahəsində "Waymo"nun "Tesla"dan xeyli irəlidə olduğu rahatlıqla demək olar. "Waymo" yaxın vaxtlarda Yaponiyada sınaq gedişlərinə başlayıb və ABŞ-da artıq bir sıra aktiv robotaksi parkına sahibdir. Əvəzində "Tesla" hələ sərnişin daşıyan avtonom xidmətə başlamayıb; şirkət bu yay Ostində robotaksi xidmətini istifadəyə verməyi planlaşdırır.

İlon Mask 2026-cı ilin sonuna qədər milyonlarla avtonom "Tesla" avtomobilinin yollarda olacağını iddia edir. Lakin onun keçmişdə verdiyi iddialı vaxt cədvəlləri nəzərə alındıqda, bu hədəflərin nə dərəcədə real olduğu sual doğurur.

"Waymo"nun fərdi istifadəçilərə avtonom nəqliyyat vasitələri satmaq planları, avtonom sürüş texnologiyalarının kommersiyalaşmasında yeni bir səhifə aça bilər. Gələcəkdə həm "Waymo", həm də "Tesla"nın bu sahədə atacağı addımlar sektorun gələcəyini formalaşdıracaq kimi görünür.

Paşa Məmmədli