İqtisadiyyat Nazirliyi yanında Əmlak Məsələləri Dövlət Xidməti (ƏMDX) "Azercell Telekom" MMC-yə məxsus mobil telefon nömrələrini açıq hərraca çıxarır.

Valyuta.az xəbər verir ki, hərrac 29 may tarixində, saat 10:00-da Bakı şəhəri, Nizami rayonu, Heydər Əliyev prospekti 139 ünvanında yerləşən Əmlak Xidmətləri Məkanında keçiriləcək.

Satışa çıxarılan mobil nömrələrin qiyməti 4 000 manatdan 36 000 manatadək dəyişir.

Hərracda iştirak etmək istəyən şəxslər lazımi sənədləri ən geci hərracın başlanmasına 3 bank günü qalmış Əmlak Xidmətləri Məkanına təqdim etməli və ƏMDX-nın Hərracların Təşkili Mərkəzinin hesabına beh ödəməlidirlər.

Qeyd edək ki, "Azercell Telekom" MMC daha əvvəl də mobil nömrələri hərraca çıxarıb. Belə ki, 11 aprel tarixində nömrələr 1 800–6 000 manat, 24 aprel tarixində isə 800–75 000 manat aralığında satışa təqdim olunmuşdu. Keçən ilin 5 dekabr tarixində keçirilən hərracda isə nömrələr 1 080–75 000 manat arasında qiymətlə satılmışdı.

Satışa çıxarılan mobil nömrələrin tam siyahısı ilə tanış olmaq üçün linkə keçid edə bilərsiniz.

Maya Hüseynova