Azərbaycan ixracı artırmaq üçün yüksək marka dəyəri olan məhsulların istehsalına nail olmalıdır. Çin son 20-30 ildə çoxlu sayda yeni markalar yaradıb və həmin markalar altında buraxılan məhsullar dünyada böyük tələb görməkdədir. 

Azərbaycan Çinlə əməkdaşlığı gücləndirməklə perspektivdə məşhur markalarının ölkəmizdə istehsalını təşkil edə bilərmi? 

Sözügedən məsələ ilə bağlı  açıqlama verən iqtisadçı Natiq Cəfərli Azərbaycanın istənilən ölkədən investisiya cəlb etməyə çalışmalı olduğunu deyib.
İqtisadçı bildirib ki, bu xüsusən də istehsal sahələrinin yaradılması məqsədilə edilməlidir.

"Lakin bunun üçün ölkədə investisiya mühiti daha da yaxşılaşdırılmalıdır. Eyni zamanda logistik imkanlar genişləndirilməli, vergi və gömrük rüsumları endirilməlidir ki, investor üçün uyğun və cəlbedici olsun". 

N.Cəfərli bir çox addımların atılmasının Azərbaycana müəyyən üstünlüklər verə biləcəyini vurğulayıb. O qeyd edib ki, ərazi baxımdan əlverişli yerdəyik:

“Okeana çıxışımız yoxdur, bu da çox önəmli faktordur. Lakin ölkəmiz yeni dəmir yolları, avtomobil yolları və logistik xətlərin üzərində yerləşir. Bu coğrafi mövqeyimizi üstünlüyə çevirmək mümkündür”.

©sfera.az