Bu gün bir çox insanın ideyası var. Bəzi şəxslərin yeni fikirləri olsa da, onları paylaşmaqdan çəkinir, ideyalarının oğurlanmasından qorxur. Ümumiyyətlə, bizim ideyalarımız oğurlana bilərmi? 

Mövzu ilə bağlı Valyuta.az-a danışan “Mediamark” Rəqəmsal Agentliyinin təsisçisi Orxan Rzayev bildirib ki, bugünkü dövrdə tapılması ən asan şey ideyadır:

"Süni intellekt texnologiyaları, o cümlədən "Chatgpt" və digər platformalar istənilən mövzuda dərhal ideya təqdim edə bilir. Artıq ideya nadir resurs deyil, demək olar ki, hər kəsin əlindədir.

Uğur isə ideyada deyil, onu həyata keçirmək bacarığındadır. Başladığın prosesi davam etdirə bilmək, dəyişikliklərə sürətlə reaksiya vermək, sektordakı yeniliklərə uyğunlaşmaq, düzgün marketinq və PR strategiyası qurmaq, məhsulu və ya xidməti vaxtında bazara çıxarıb satmağa başlamaq və böyümək - bunlar uğurun əsas şərtləridir".

O.Rzayev qeyd edib ki, ideyanı heç kimlə bölüşmədikdə nə komanda qurmaq, nə investor tapmaq, nə də partnyorla işləmək mümkündür. 

"Bu halda da proses ümumiyyətlə başlamır. Real vəziyyətdə isə ideyanı kiminsə eşidib uğurla həyata keçirməsi nadir haldır. Çünki ideyanı ən yaxşı anlayan, onu yaşadan və inkişaf etdirə biləcək şəxs məhz sən özünsən.

Əgər həqiqətən dəyərli bir ideyan varsa və onun oğurlanmasından narahatsansa, onu əvvəlcə etibar etdiyin insanlarla, mentorlardan ibarət çevrə ilə bölüşə bilərsən. Amma unutma ki, sadəcə ideyanı qorumaqla yox, onu inkişaf etdirib həyata keçirməklə uğura çatmaq mümkündür".

"Əlbəttə, ideyaların oğurlanması riski həmişə olub, bundan sonra da olacaq. Bu, sahibkarlıq yolunun bir hissəsidir. Amma bu riskdən qorxub heç nə etməmək, daha böyük riskdir", - deyə o, vurğulayıb.

Maya Hüseynova