"Nokia" rüblük mənfəət gözləntilərini qarşılaya bilməyib. 

Valyuta.az xəbər verirki, Finlandiyanın texnologiya şirkəti "Nokia" 2025-ci ilin birinci rübündə gözləniləndən aşağı mənfəət açıqlayıb və ABŞ Prezidenti Donald Tramp tərəfindən tətbiq edilən gömrük rüsumlarının şirkətin ikinci rüb mənfəətinə 20–30 milyon avro aralığında mənfi təsir göstərə biləcəyini bildirib.

Məlumata görə, şirkətin müqayisəli əməliyyat mənfəəti cari ilin ilk rübündə 156 milyon avro (176.9 milyon ABŞ dolları) təşkil edib. Bu göstərici analitiklərin "LSEG" tərəfindən aparılan sorğulara əsasən verdikləri 243.83 milyon avroluq proqnozdan 36% az olub.

ABŞ-da satışlar son illərdəki zəiflikdən sonra artmaqda davam etsə də, Trampın genişmiqyaslı rüsumları bu tendensiyanı ləngidə bilər", – deyə şirkət əlavə edib. Bildirilib ki, şirkətlər qiymət artımı riski səbəbindən sifarişləri dayandıra bilər.

Bununla yanaşı, "Nokia" ABŞ-da mobil operator "T-Mobile" ilə 5G şəbəkəsinin əhatə dairəsini genişləndirmək məqsədilə tərəfdaşlığını çoxillik strategiya çərçivəsində uzatdığını açıqlayıb.
Şirkətin ümumi rüblük gəliri 4.39 milyard avro təşkil edib ki, bu da ötən ilin eyni dövrü ilə müqayisədə 1% azdır və analitiklərin 4.41 milyard avro proqnozundan aşağıdır.

"Reuters"ə danışan "Nokia" nümayəndələri şirkətin "Infinera"nı satın almasını da nəzərə alaraq, ilin qalan hissəsi üçün proqnozlarını təsdiqləyib.

Sərvanə Rəmixanova