Süni intellekt sahəsində aparıcı şirkətlərdən biri olan "OpenAI" "Google Chrome" brauzerini almaq imkanını nəzərdən keçirir. 

Valyuta.az "TechCrunch" portalına istinadən xəbər verir ki, bu barədə şirkətin nümayəndəsi ABŞ Ədliyyə Nazirliyi tərəfindən aparılan antiinhisar məhkəmə prosesində bildirib.

"OpenAI"nin "“ChatGPT" layihəsinin icraçı direktoru Nik Terli məhkəmə dinləmələri zamanı deyib ki, belə bir addım istifadəçilərə süni intellektlə tam inteqrasiya olunmuş yeni brauzer təcrübəsi təqdim etməyə imkan verəcək.

Qeyd edək ki, ABŞ Ədliyyə Nazirliyi "Google"un monopolist biznes təcrübələrinə qarşı hüquqi proses başladıb və tələblərdən biri də "Chrome" brauzerinin satışa çıxarılmasıdır.

Keçmişdə "OpenAI" şirkətinin öz brauzerini yaratmaq niyyəti olduğu dəfələrlə xəbər verilib. Hətta bu məqsədlə "Chrome"un sabiq tərtibatçıları Ben Gudjer və Darin Fişer kimi tanınmış mütəxəssislər də cəlb olunub. Lakin hazırda bu layihə ilə bağlı rəsmi detallı məlumat mövcud deyil.

2025-ci ilin mart ayına olan məlumata əsasən, "Google Chrome" kompüter və mobil cihaz bazarında 66,17% payla lider mövqedədir. Onu "Apple"ın "Safari"si (17,59%) və "Microsoft Edge" (5,18%) izləyir.

Əgər "OpenAI" doğrudan da "Chrome" brauzerini əldə edərsə, bu, süni intellekt texnologiyalarının gündəlik internet istifadəsinə daha dərin inteqrasiyası baxımından mühüm mərhələ olacaq. Lakin məsələ hələlik ehtimal səviyyəsindədir və "Google"un bu yöndə qərar verib-verməyəcəyi naməlumdur.

Paşa Məmmədli