Azərbaycanda innovativ sahibkarların ideyalarını reallaşdırmaq üçün yeni imkan yaradılıb.

Valyuta.Az xəbər verir ki, Fərdi sahibkar Bəhruz Qədirovun təşəbbüsü ilə qurulan İdeamarket.az platforması, ideyası olan şəxslərin bu ideyaları satışa çıxarması, sponsor və ya investor cəlb etməsi üçün nəzərdə tutulub.

Platforma vasitəsilə ideya müəllifləri birbaşa şirkətlərə müraciət edə, icraçılar isə müəlliflərlə görüş keçirmədən ideyanın detalları ilə tanış ola və əməkdaşlıq təklifi verə biləcəklər. Bir kliklə ideyanı bir neçə şirkətə göndərmək imkanı da mövcuddur. Bu, həm vaxt, həm də resurs baxımından ciddi üstünlük hesab olunur.

Bəhruz Qədirov qeyd edir ki, sayt ənənəvi sponsor axtarışı prosesinin çətinliklərini aradan qaldırmaq məqsədi daşıyır: “Məsələn, televiziya layihəsi üçün sponsor tapmaq uzun və yorucu prosesdir – əvvəl marketinq şöbəsi, sonra rəhbərliklə görüşlər... İdeamarket.az bu mərhələləri xeyli asanlaşdırır.”

Platformanın ən böyük üstünlüklərindən biri çoxsaylı ideyaların bir yerdə toplanması və təhlükəsiz şəkildə icraçılara təqdim olunmasıdır. Əməliyyatlar tam şəffaf və qorunan şəkildə aparılır. Hal-hazırda platformanın mobil tətbiqi mövcud deyil, lakin bu istiqamətdə işlər prioritet sayılır.

Qədirovun sözlərinə görə, vergi güzəştləri və dövlət dəstəyi kimi təşəbbüslər platformanın inkişafı və beynəlxalq bazarlara çıxışı üçün önəmli ola bilər. Sayt artıq test mərhələsini uğurla başa vurub və yaxın günlərdə geniş tanıtım kampaniyasına start veriləcək.

Qeyd edək ki, platforma bu günlərdə Kiçik və Orta Biznesin İnkişafı Agentliyində (KOBİA) yaradılmış Ekspertlər Şurasının qərarı ilə vergi güzəşti nəzərdə tutan “Startap” şəhadətnaməsi əldə edib.