İsmayıllı rayonunda yerləşən Şeyx Məhəmməd məscidinin ( arxeoloji muzey ) bərpası həyata keçiriləcək. 

Valyuta.Az xəbər verir ki, bununla bağlı Dövlət Turizm Agentliyi tərəfindən müvafiq işlərə start verilib. 

Məlumata əsasən, “Basqal” Dövlət Tarix-Mədəniyyət Qoruğunda yerləşən məscidin bərpasına 200 min manatdan çox vəsait xərclənəcək. 

Həmçinin, məscidə məxsus ərazinin də abadlaşdırılması nəzərdə tutulur. 

Sözügedən işlərin görülməsi Dövlət Turizm Agentliyi tərəfindən "Tələt" firmasına həvalə olunub. Tərəflər arasında imzalanacaq müqavilənin dəyəri 284.018,91 AZN-dir. 

Qeyd edək ki, "Basqal” Dövlət Tarix-Mədəniyyət Qoruğu Basqal qəsəbəsinin qədim hissəsini əhatə edir. 1989-cu ildə təşkil edilən qoruğun sahəsi 76 hektardır. 

Şeyx Məhəmməd məscidi isə Sufi Dərviş Əlinin oğlu Pir Məhəmmədin əmri ilə 1531-ci ildə tikilib.

Əlavə edək ki, Dövlət Turizm Agentliyi öncələr də bir sıra işlərini də "Tələt" firmasına həvalə edib. 

Bunlara “Basqal” Dövlət Tarix-Mədəniyyət Qoruğundakı “Partizan Məmmədin” evinin bərpa layihəsi,   Qobustan ərazisində yerləşən palçıq vulkanları Müasir Turizm Kompleksinə FO-24 kabelin çəkilməsi və s. nümunə göstərmək olar. 

Qeyd edək ki, 10 AZN nizamnamə kapitalına malik şirkətin qanuni təmsilçisi Rüstəmov Rafiq Mehman oğludur. Şirkət Füzuli rayonunda qeydiyyatdadır.

Rəhim