"Apple" şirkəti "MacBook Air M4" modelindəki kimi "Sky Blue" rəngində olan "iPhone 17 Pro" modelini təqdim edə bilər. 

Valyuta.az xəbər verir ki, bu barədə tanınmış insayder Majin Bu "Apple"ın təchizat zəncirindəki mənbələrə istinadən məlumat verib.

İnsayderin sözlərinə görə, hazırda "iPhone 17 Pro" modelinin müxtəlif rənglərdə olan prototipləri sınaqdan keçirilir və "Sky Blue" rəngi ən perspektivli variant kimi qiymətləndirilir. Yeni rəng o qədər güclü təəssürat yaradıb ki, onun "iPhone 13 Pro" modelində istifadə olunan məşhur "Sierra Blue" rəngi ilə müqayisə olunduğu bildirilir.

Məlumata əsasən, "iPhone 17 Pro" yenilənmiş arxa panel dizaynı, alüminium və şüşədən ibarət korpus, "Apple A19 Pro" flaqman prosessoru, üçlü 48 meqapiksellik kamera və 24 MP ön kamera ilə təchiz ediləcək.

Bundan başqa, "Apple"ın smartfonlar seriyasına tamamilə yeni bir model - "iPhone 17 Air" də əlavə ediləcək. Bu modelin "Plus" versiyasını əvəz edəcəyi və rekord incəlikdə korpusa, bir arxa kameraya, mono dinamikə və fiziki SIM kart dəstəyinin olmamasına malik olacağı bildirilir.

"iPhone 17" modellərinin təqdimatının 2025-ci ilin sentyabr ayında baş tutacağı gözlənilir.

Paşa Məmmədli