Afrika qitəsi Avropanın turistlərlə dolub-daşan adalarına ideal alternativ kimi təqdim olunur. Qitənin adaları həm təbii gözəllikləri, həm də mədəni müxtəlifliyi ilə fərqlənir və bu yerlər turistlər üçün qeyri-adi və cəlbedici tətil imkanları yaradır. 

Valyuta.az xəbər verir ki, "Express" nəşrinin təqdim etdiyi siyahıya Afrika qitəsinin beş ən cazibədar adası daxildir.

Madaqaskar

Hind okeanında, Mozambik sahilləri yaxınlığında yerləşən bu ada ekzotik təbiəti, əl dəyməmiş çimərlikləri və sıx tropik meşələri ilə yadda qalır. Madaqaskar nadir heyvan növləri ilə zəngindir və bu da onu təbiət həvəskarları üçün ideal məkana çevirir.

Lamu

Keniya sahillərinin yaxınlığında yerləşən və cəmi 25 min nəfər əhalisi olan bu kiçik ada, zamana səyahət kimi hiss etdirir. Şərqi Afrikada suahili mədəniyyətinin ən qədim yaşayış məntəqələrindən biri olan Lamuda avtomobillərin sayı azdır və ada öz tarixi memarlığı, canlı bazarları və rahat çimərlikləri ilə tanınır.

Mavriki

Fransa və Böyük Britaniyanın keçmiş koloniyası olan Mavriki mədəni müxtəliflik baxımından zəngin bir adadır. Çimərliklərdən uzaqda yerləşən qayalı dağlar gəzinti həvəskarları üçün geniş imkanlar yaradır. Eyni zamanda, ada vindsörfinq və kaitsörfinq kimi su idman növləri üçün Afrikanın ən yaxşı yerlərindən biri hesab olunur.

Zənzibar

Tanzaniyaya məxsus yarı-muxtar bölgə olan Zənzibar əsas ada olan Unquca (Zənzibar), Pemba və bir neçə kiçik adadan ibarətdir. Ada müxtəlif mədəniyyətlərin və tarixi təbəqələrin təsirini daşıyır. Daş şəhərdə yerləşən bazarlarda ada mətbəxinin ən yaxşı nümunələri təqdim olunur. Tropik çimərliklər isə müxtəlifrəngli balıqlar və digər su canlıları ilə dolu, büllur kimi mavi sulara sahibdir.

Bazaruto arxipelaqı

Afrikanın daha az tanınan, lakin unudulmaz istirahət təklif edən guşələrindən biri də Mozambikin sahilləri yaxınlığında yerləşən Bazaruto arxipelaqıdır. Beş qumlu adadan ibarət olan arxipelaq, sualtı dünyanı kəşf etmək istəyən dalğıclar və snorkelinqlə maraqlananlar üçün əvəzolunmaz məkandır. Buradakı kəndlər portağal və keşyu ağaclarının kölgəsində gizlənmiş vəziyyətdədir, bu isə səyahətçilərə Afrikanı tam fərqli bucaqdan görmək imkanı verir.

Paşa Məmmədli