Cənubi Koreyanın "LG" və "Samsung" şirkətləri Hindistan hökumətinin elektron tullantıların təkrar emalı ilə bağlı yeni qiymət siyasətinə etiraz edərək Dehli Ali Məhkəməsinə müraciət ediblər.

Valyuta.az xəbər verir ki, yeni qaydalara əsasən, elektronika şirkətləri hər kiloqram məhsul üçün təkrar emalçılara minimum 22 rupi (təxminən 0,25 ABŞ dolları) ödəməlidirlər. 

Şirkətlər isə bu ödənişlərin onların xərclərini üçqat artıracağını və bu tənzimləmənin ətraf mühitin mühafizəsinə real təsir göstərməyəcəyini bildirirlər.

"LG" məhkəməyə təqdim etdiyi sənədlərdə qeyd edib ki, bu cür ödənişlərin tətbiqi yalnız şirkətlərin üzərinə vergi yükü qoymaqla məqsədə çatmağı hədəfləyir və əgər qeyri-rəsmi sektor nəzarətsiz qalırsa, bu, hökumətin icra mexanizminin zəifliyidir.

"Samsung" isə bildirib ki, hazırda ödənilən məbləğlə müqayisədə yeni tariflər 5-15 dəfə yüksəkdir və bu, şirkətə ciddi maliyyə zərəri vuracaq.

Oxşar səbəblərlə Hindistanın digər şirkətləri – "Daikin", "Havells", "Voltas" və "Blue Star" da məhkəməyə müraciət ediblər. "Johnson Controls-Hitachi" isə iddiasını geri çəkib.