Türkan Əkbərova
Almaniyada “Accenture” şirkətində İnsan resursları mütəxəssisi

Mən qətiyyən “hə” və ya “yox” deməyəcəm, bəzi nüansları yazacam, seçim etmək sizə qalır.
Onu da qeyd edim, bir az “Valideyn”, yəni uşaqlı bir yetişkin perspektivilə yazacam. Çünki valideyn olanlar məni başa düşəcək, övlad olanda demək olar ki, bütün qanunlar onun komfortunun, xoşbəxtliyinin üstündə qurulur. 

Mən hazırda Berlində yaşayıram, daha öncələri isə Essendə.

İlk olaraq bəyənmədiyim nüansları qeyd edim:
- Büroratiya əsl problemdir.
- Həkim tapmaq, qəbula düşmək çətindir. İstədiyiniz zaman, istədiyiniz həkimə gedə bilməzsiniz.
- Təcili yardıma getsəniz belə, həkimin qəbulunuzu 7-8 saata qədər gözləyə bilərsiniz.
- Uşaq bağçalarında kamera yoxdur. Hətta bir “Taggesmutter” (Googleda araşdırın) uşaqlara zülm etdiyini, səs yazan vasitəsilə yazmışdılar, cinayət sayıldığı üçün, ortaya çıxara bilmədilər.
- Bəzən “qara işləyənlər” sizdən - vergi ödəyənlərdən daha çox ala bilir. Sosial dövlətin gözəlliyi dəstəyindədir. Amma sui-istifadəyə qədər. Dövlət də bu sui-istifadəni ciddiyə almırsa, siz bir az demotivasiya ola bilərsiniz.
- Çünki, vergilər yüksəkdir. 42% qədər vergisi ilə düşünün ki, 55000-65000 arası ortalama illik brüt bir maaşınız var və şəhərə və s. görə dəyişən bir yaşamınız var.
- Küçələrdə kamera yoxdur əsasən. Məsələn, maşınınıza xəsarət yetirsələr, sığorta qarşılayır. Çox yerdə kamera olmadığı üçün və əsasən də bu cür hadisələrin gecələr baş verdiyi üçün, kamerasız küçələrdə tapılmır.
- Sağlıq sığortası bahadır, təklifinə görə istədikləri pul çoxdur.
- Uşaq bağçalarında yer yoxdur, məktəblərdə müəllimlər bəzən həftələrlə xəstəlik kağızı alıb 6 həftəyə qədər gəlmirlər. 

- İstər bağça istərsə də Taggesmutter çox bahadır. Biz evdən qızıma görə 380 avro + 70 avro yemək pulu ödəyirdik + özümüz bez, sulu salfet və s. kimi şeylərin də, əlavə alıb verirdik.

- Məktəb sistemini ümumiyyətlə bəyənmirəm. Uşaqların universitetə gedib-getməyəcəyini 10 yaşında qərar verilməsinin tərəfdarı deyiləm.
- İşdən sonra və bazar günləri şəhərdən asılı olaraq bir “inni-cinni” görə bilməzsiniz :)
- İşlər çox yavaş gedir. Yollar qazılıbsa, vəssəlam, hardasa 5 il çəkər.
- Düzgün idarə edilməyən və kontrol altına alınmamış miqrasiya məsələsi var.
- Alman dili çətindir və ingilis dili hər yerdə danışılmır.

İndi gələk pozitiv gördüklərimə:
- Az maaşla, kiçik bir qəsəbədə belə rahatlıqla yaşaya bilərsiniz.
- Alım gücü yüksəkdir, hər gün ət yeyə bilərsiniz. Yəni boğazınızdan kəsmək məcburiyyətində deyilsiniz.
- Yollarda sürücü mədəniyyəti yüksəkdir.
- Almanlar candır! Soyuq görünsələr də, o qədər köməyə hazır, o qədər dürüst, o qədər gözəldir ki… Almanları çox sevirəm.
- Ecazkar təbiəti, təmiz havası, birbaşa şəbəkədən içilən suyu var. 

- Sosial dövlətdir və dövlət hər zaman sizin yanınızda olmağa çalışır.
- Sığortanız varsa, sözsüz işləyir.
- Uşaqlara dərmanları pulsuz alırsınız.