Misirin Qırmızı dəniz sahilində toxunulmamış çimərliklə potensial turizm inkişafı arasında mübarizə alovlanır.

Valyuta.az xəbər verir ki, "Independent"ın yazdığına görə, Vadi-el-Həmal Milli Parkının incisi olan Ras-Xankorab öz toxunulmamış dəniz ekosistemi ilə tanınır, lakin hazırda bağlıdır və onun gələcəyi ip üstündədir. Hurqadadan 4 saatlıq məsafədə yerləşən Ras-Xankorab kristal təmiz suyu və ağ qumlu çimərlikləri ilə fəxr edir.

Ancaq planlara görə, bu əraziyə otel, restoran və ferma tikiləcək. Ekoloqlar xəbərdar edirlər ki, turizm inkişafı nəhəng dəniz tısbağaları, mərcan rifləri, dəniz otları və müxtəlif balıq növləri üçün həyat mühiti yaradan həssas ekosistemə təhlükə yaradır. Yerli icmalar da bu qiymətli təbii sərvəti itirməkdən qorxurlar.

Misir gəlirlərini artırmaq üçün milli parklarına investisiya lisenziyaları verir. Turizm Misirin xəzinəsini əhəmiyyətli dərəcədə doldurur. BMT-nin hesabatına görə, 2024-cü ildə Misirin turizmdən gəliri 14,1 milyard dollar olub ki, bu da Süveyş kanalından əldə olunan gəliri belə üstələyib.

"Bu iqtisadi stimul Ras-Xankorab kimi bərpa olunmaz təbii sərvətlər hesabına əldə ediləcəkmi?", deyə nəşr sual edir.

Ekoloqlar və yerli icmalar xəbərdar edirlər ki, çimərlikdə hətta yüngül tikinti işləri belə Misirin son qalmış toxunulmamız dəniz qoruqlarından birini məhv edə bilər.

Misirin təbiəti qoruma qrupu "Ecoris"in icraçı direktoru Asmaa Əli deyib:

"Burada qoruq sahəsində yerləşən ən dəyərli mərcan riflərindən biri var. Həmçinin nəsli kəsilmək təhlükəsində olan dəniz tısbağaları və manqrov ağacları mövcuddur".

Ətraf Mühitin Qorunması Assosiasiyası isə əlavə edib ki, bu rif iqlim dəyişikliyinə dünyada ən davamlı riflərdən biri olduğu və digər rifləri bərpa etmək, hətta nəsli kəsilməkdə olan növləri geri qaytarmaq potensialına malik olduğu üçün xüsusi əhəmiyyət kəsb edir.

Paşa Məmmədli