“Azərişıq” Açıq Səhmdar Cəmiyyəti tərəfindən Cəbrayıl rayonunun beş kəndində xarici elektrik təchizatının yaxşılaşdırılması məqsədilə yeni layihə həyata keçirilir.

Valyuta.az xəbər verir ki, elektrik təchizatı rayonun Soltanlı, Sarıcallı, Maşanlı, Böyük Mərcanlı və Karxunlu kəndlərinə çəkiləcək.

Bu məqsədlə layihə çərçivəsində 35 kV-luq iki dövrəli ÖİN (SİP-3) elektrik veriliş xətti çəkiləcək. 

Bu məqsədlə görüləcək işlərə 5 milyon 811 min 577 manat vəsait ayrılıb.

Yeni elektrik xəttinin istifadəyə verilməsi kəndlərdə yaşayış və təsərrüfat fəaliyyətlərinin enerji təchizatını əhəmiyyətli dərəcədə yaxşılaşdıracaq.

Qeyd edək ki, bundan qabaq “Azərişıq” Füzulinin Qoçəhmədli, Qarğabazar və Cuvarlı yaşayış məntəqələrinin xarici elektrik təchizatının təmin olunması məqsədilə 1 milyon 141 min 964 manat vəsaitlik tender də elan edib.

Maya Hüseynova