Məşhur süni intellekt tədqiqatçısı Tamay Besiroğlu tərəfindən yaradılan və bu həftə təqdim olunan "Mechanize" adlı yeni startap diqqət çəkə bilib.

Valyuta.az xəbər verir ki, startapın əsas hədəfi bütün işin və iqtisadiyyatın tam avtomatlaşdırılması və  hər növ əmək fəaliyyətini süni intellekt vasitəsilə əvəz etməkdir. Besiroğlu bu təşəbbüsü "X" sosial şəbəkəsində açıqlayıb və qeyd edib ki, layihə ilk mərhələdə ofis işlərinə yönələcək.

Startapın elanından sonra sosial şəbəkələrdə tənqidlər səngiməyib. İstifadəçilər həm "Mechanize"in məqsədini, həm də Besiroğlunun süni intellektin iqtisadi təsirlərini öyrənən "Epoch" tədqiqat institutuna mümkün mənfi təsirlərini müzakirə ediblər. Bəzi şərhçilər bu addımın institutun tərəfsizliyini şübhə altına aldığını bildiriblər. Xatırladaq ki, "Epoch" daha əvvəl də "OpenAI" ilə əməkdaşlığı barədə açıqlamaları gecikdirdiyinə görə tənqid olunmuşdu.

Besiroğlu "Mechanize"in bazar potensialını insanların hal-hazırda aldıqları maaşlar üzərindən hesablayaraq təqdim edib. Onun sözlərinə görə, təkcə ABŞ-da işçilərə illik 18 trilyon dollar ödənilir, qlobal miqyasda isə bu rəqəm 60 trilyon dollardan çoxdur. O iddia edir ki, əmək fəaliyyətinin tam avtomatlaşdırılması partlayış xarakterli iqtisadi artıma, rifahın yüksəlməsinə və bu gün mövcud olmayan məhsul və xidmətlərin meydana çıxmasına səbəb ola bilər.

Lakin ekspertlər bildirirlər ki, iş yerlərinin tam avtomatlaşdırılması ciddi sosial-iqtisadi problemlər yarada bilər. Besiroğlu isə cavab olaraq qeyd edir ki, gələcəkdə insanlar AI-nin edə bilmədiyi rollarda daha dəyərli ola bilər və dolanışıqlarını kirayə gəliri, dividendlər və ya dövlət dəstəyi ilə təmin edə bilərlər. Hazırda isə o, bu vizyonu reallaşdırmaq üçün yeni işçilər axtarır.