ABŞ-da sabiq prezident Donald Trampın rəhbərliyi ilə tətbiq olunan yeni ixrac nəzarəti qaydalarından sonra "Nvidia"nın səhmlərində eniş davam edib. 

Valyuta.az xəbər verir ki, süni intellekt çipləri istehsalçısının səhmləri cümə axşamı günü təxminən 3 faiz ucuzlaşıb və bundan bir gün əvvəlki 7 faizlik enişi daha da dərinləşdirib.

"Nvidia" çərşənbə axşamı gecə saatlarında verdiyi açıqlamada ABŞ-ın getdikcə sərtləşən ticarət qaydalarına uyğunlaşmaq məqsədilə Çinə xüsusi hazırlanmış H20 çiplərinin satışının qadağan edilməsinin şirkətə birinci rübdə 5,5 milyard dollarlıq zərər verəcəyini bildirib.

"Bloomberg"in məlumatına görə, şirkətin cümə axşamı günkü səhmlərindəki eniş "Nvidia"nın bazar dəyərini 2,47 trilyon dollara endirib. Bu isə, sərt ticarət qaydalarının elanından bu yana şirkətin ümumilikdə 266 milyard dollar dəyər itirdiyini göstərir.

"JPMorgan" analitiki Harlan Sur çərşənbə günü yayımladığı qeyddə bu dəyişikliklərin "Nvidia"nın illik məlumat mərkəzi gəlirlərini və hər səhmə düşən qazancını 8-10 faiz azalda biləcəyini bildirib. Bu isə təxminən 15-16 milyard dollarlıq gəlir itkisi deməkdir. "Jefferies" analitiki Blayn Kurtis isə daha mülayim yanaşaraq 10 milyard dollarlıq itki gözlədiyini deyib.

Yeni ticarət məhdudiyyətləri "Wall Street"i təəccübləndirib. "NPR" yaxın günlərdə yaydığı məlumatda Trampın Mar-a-Lagoda "Nvidia"nın baş direktoru Censen Huanqla nahar etdiyi və bu görüşdən sonra H20 çiplərinə qoyulacaq məhdudiyyətlərdən imtina etdiyinin bildirildiyi qeyd edilmişdi. Buna baxmayaraq, məhdudiyyətlər qüvvədə qalıb. "Nvidia" məsələyə dair şərh verməkdən imtina edib.

"Bloomberg" yazır ki, şirkətin çərşənbə axşamı verdiyi bəyanatdan cəmi iki gün sonra Censen Huanq yerli ticarət təşkilatının dəvəti ilə Pekinə səfər edib.

Həftənin əvvəlində "Nvidia", Trampın ticarət siyasətinə qarşı texnologiya sənayesinin yerli istehsalı gücləndirmək niyyətində olduğunu bildirib və növbəti dörd il ərzində ABŞ-da süni intellekt infrastrukturu üçün 500 milyard dollara qədər sərmayə qoyacağını açıqlayıb.

Tramp isə bu həftə yarımkeçiricilərə gömrük rüsumları tətbiq etməyə hazırlaşdığını açıqlayıb. ABŞ Ticarət Nazirliyi çərşənbə axşamı 1962-ci il "Ticarətin Genişləndirilməsi Aktı"nın 232-ci bölməsi çərçivəsində kompüter çipləri üzrə yeni bir milli təhlükəsizlik araşdırması başlatdığını bildirib. Tramp, elektron məhsulların da rüsumlara daxil ediləcəyini vəd edib. O, bazar günü yaydığı mesajında "yarımkeçiricilər və bütöv elektron təchizat zəncirinə baxış keçiriləcəyini" bildirib.

"Nvidia" ilə yanaşı, ABŞ-ın Çinə çip ixracına qoyduğu yeni məhdudiyyətlər digər texnologiya şirkətlərinə də təsir edib. Rəqib "Advanced Micro Devices" (AMD) şirkətinin səhmləri təxminən 1 faiz, "Broadcom" (AVGO) səhmləri 2,1 faiz, "Intel" (INTC) isə 1,6 faiz enib.

Paşa Məmmədli