"Premium Bank" 2025-ci ilin I rübü üçün maliyyə hesabatını açıqlayıb. 

Valyuta.Az xəbər verir ki, yanvar-mart aylarını əhatə edən cari ilin I rübündə bankın mənfəəti 38.45% azalaraq  1 mln. 582 min manata düşüb. Ötən ilin müvafiq dövründə bankın əldə etdiyi xalis mənfəət 2 mln. 570 min manat olub. 

Hesabat dövründə bankın faiz gəlirlərində artım qeydə alınsa da, qeyri-faiz gəlirlərində azalma müşahidə olunub. Belə ki, əvvəlki ilin müvafiq dövrü ilə müqayisədə bankın faiz gəlirləri 12.87% artaraq 7 mln. 842 min manatdan 8 mln. 851 min manata yüksəlib. Qeyri-faiz gəlirləri isə 21.21% azalaraq 3 mln. 801 min manatdan 2 mln. 995 min manata düşüb.

Həmçinin hesabat dövründə faiz xərcləri cüzi azalsa da, qeyri-faiz xərclərində 200 min manatdan çox artım qeydə alınıb. Faiz xərcləri 2 mln. 878 min manatdan 2 mln. 876 min manata enib. Lakin qeyri-faiz xərcləri 5 mln. 838 min manatdan 6 mln. 88 min manatadək artıb.

Ötən ilin son rübü ilə müqayisədə bankın öhdəliklərində artım yaşanıb. Sözügedən dövrdə bankın öhdəlikləri 20 mln. manatdan çox artaraq 463 mln. 9 min manatdan 486 mln. 858 min manata yüksəlib.

Həmçinin şirkətlər bir neçə milyon manatını da bankdan geri çəkiblər. 

Belə ki, hüzquqi şəxslərin bankdakı depozitləri əvvəlki ilin son rübü ilə müqayisədə 2 mln.dan çox azalaraq 85 mln. 706 min manatdan 83 mln. 194 min manata düşüb.

Fiziki şəxslərin depozitləri isə 8.93% artaraq 292 mln. 55 min manatdan 318 mln. 151 min manata yüksəlib. 

Bundan əlavə bankın vaxtı keçmiş kreditlərinin həcmi isə 3 mln. 65 min manat təşkil edib. Bunun da 2 mln. 794 min manatı Bakı, 212 min manatı Abşeron-Xızı, 50 min manatı Gəncə–Daşkəsən, 8 min manatı Naxçıvan ərzaisi üzrə verilmiş kreditlər təşkil edib. 

Rəhim