Böyük Britaniya nəhəngi "Jaguar Land Rover", Donald Trampın avtomobil idxalına tətbiq etdiyi tariflərin təsirini qiymətləndirmək məqsədilə ABŞ-yə göndərişləri bir aylıq dayandıracağını bildirib.

Valyuta.Az xəbər verir ki, bu qərar Tramp administrasiyasının genişmiqyaslı tarif tədbirlərinin qlobal fond bazarlarında qarışıqlığa səbəb olduğu və avtomobil sənayesində zəlzələ effekti yaratdığı bir vaxtda verilib.

Xatırladaq ki, Tramp ölkəyə idxal olunan bütün xarici avtomobillərə 25 % tarif tətbiq olunacağını açıqlayıb və bu qərar cümə axşamı qüvvəyə minib. Ağ ev həmçinin bəyan edib ki, bəzi avtomobil ehtiyat hissələrinə də mayın 3-dən gec olmayaraq əlavə tariflər tətbiq olunacaq.

"Biz ticarət tərəfdaşlarımızla yeni ticarət şərtlərini tənzimləmək üzərində çalışarkən, aprel ayında göndərişlərin müvəqqəti dayandırılması da daxil olmaqla planlaşdırdığımız qısamüddətli tədbirləri həyata keçiririk və orta və uzunmüddətli planlarımız üzərində işləyirik", – deyə "Jaguar Land Rover"in sözçüsü "CNBC"yə bildirib.

Britaniyanın ən böyük avtomobil istehsalçılarından biri olan "Jaguar Land Rover" ABŞ-ni şirkətin lüks avtomobil markaları üçün "əhəmiyyətli bir bazar" adlandırıb.

Trampın avtomobil tarifləri qüvvəyə mindikdən sonra bir neçə böyük avtomobil istehsalçısı qiymət artımları, idxal haqları, istehsalın dayandırılması və hətta işçilərin ixtisarı ilə bağlı planlarını açıqlayıb.

Böyük Britaniyanın Baş naziri Keir Starmer hökumətinin Trampın tariflərinə "sakit və soyuqqanlı" reaksiya verəcəyini və ABŞ ilə mümkün ticarət sazişi üzrə danışıqların davam etdiyini bəyan edib.

25 % avtomobil ixracı tariflərinə əlavə olaraq, polad və alüminium məhsullarına da tarif tətbiq olunub və Böyük Britaniya bu həftə tətbiq edilən 10 % baza idxal rüsumuna məruz qalan ölkələr arasında yer alıb.

Rəhim