Şərab turizmi təkcə sevimli içkilərin dadına baxmaqla kifayətlənməyən, həm də onların hazırlanma prosesi ilə tanışlıq və təbiət mənzərələrindən həzz alma imkanı verən bir istirahət növü kimi qurmanlar arasında geniş yayılıb.

Valyuta.Az xəbər verir ki, "Emerald Cruises” xidməti "Google” platformasındakı minlərlə istifadəçi rəyini araşdıraraq Avropanın ən yaxşı 10 şərab regionunu müəyyən edib. 

Bu reytinqin lideri isə təəccüblü olmayaraq Fransanın cənub-qərbində yerləşən və dünyanın ən prestijli üzüm bağlarından bəzilərinə ev sahibliyi edən Bordo regionu olub.

"Time Out” nəşrinin sitat gətirdiyi araşdırmaya əsasən, Bordo 96 xallıq təsirli nəticə ilə siyahının ilk pilləsində qərarlaşıb. Bu nəticə 112 063 beşulduzlu istifadəçi rəyi və yüksək dəyərləndirilmiş doqquz dequstasiya təcrübəsi əsasında əldə edilib. Bordo xüsusilə dolğun qırmızı şərabları ilə məşhurdur.

İkinci yerdə isə Macarıstanın məşhur "Egri Bikavér” (tərcümədə "buka qanı") qırmızı şərabı ilə tanınan Eger regionu qərarlaşıb. Bu regionda 16 yüksək qiymətləndirilmiş dequstasiya məkanı mövcuddur.

Üçüncü pilləni isə İtaliyanın mərkəzində yerləşən Toskana regionu tutub. Burada klassik Sancoveze üzüm növü ilə birlikdə "Kaberne Sovinyon" və "Merlo" kimi digər növlərin qarışığından hazırlanan "supertoskan” şərabları geniş populyarlıq qazanıb.

SAraşdırma həmçinin "Google” axtarış statistikalarına əsasən hansı regionların hazırda "trendi” olduğunu da müəyyən edib. Son üç ayda axtarış sayı 400 faiz artan Yunanıstanın Krit adası bu siyahıya başçılıq edir. Onu Fransanın Provens regionu (143 faiz artım) və İtaliyanın Siciliya adası (129 faiz artım) izləyir.

Avropanın 2025-ci il üçün ən yaxşı 10 şərab regionu:

1. Bordo, Fransa
2. Eger, Macarıstan
3. Toskana, İtaliya
4. Rioxa, İspaniya
5. Şampan, Fransa
6. Françakorta, İtaliya
7. Santorini, Yunanıstan
8. Ribera-del-Duero, İspaniya
9. Doru vadisi, Portuqaliya
10. Priorat, İspaniya

© Qaynarinfo