Son günlərdə bütün ölkələrə gömrük rüsumları tətbiq edərək beynəlxalq bazarları silkələyən Tramp bu dəfə diqqətini Çinə yönəldib. 

Valyuta.az xəbər verir ki, Trampın son müsahibəsində verdiyi üstüörtülü mesaj "TikTok" ətrafında maraqlı bir razılaşmanın ola biləcəyinə işarə edib.

Donald Tramp bildirib ki, tətbiq olunan gömrük tarifləri ABŞ-ın digər ölkələrlə danışıqlarda üstünlük qazanmasına səbəb olur. Bu çərçivədə TikTok məsələsinə toxunan Tramp Çinin razılaşmaya çox yaxın olduğunu deyib. Trampın "TikTok-u sat, gömrük rüsumundan qurtul" tipli mesajı, bu sosial media platformasının ABŞ tərəfdaşlarına satılması müqabilində Çin mallarına tətbiq edilən tariflərin yumşaldıla biləcəyini göstərir. Hərçənd o, bunu açıq şəkildə deməsə də, ABŞ mənbələri danışıqların bu yöndə aparıldığını təsdiqləyir.

Belə ki, hazırda TikTok-un ABŞ-dakı əməliyyatlarının yerli şirkətlərə verilməsi gündəmdədir. "Financial Times"ın əldə etdiyi məlumata görə, bir neçə iri investisiya qrupu bu prosesə qoşulmağa hazırdır. Həmin şirkətlərin TikTok-un 30 faizinə sahib olacağı və bununla da Çinli ana şirkət "ByteDance" üzərində daha böyük təsir imkanına yiyələnəcəyi iddia olunur.

Rəsmi razılaşma hələ imzalanmasa da, ABŞ tərəfi bu planı yaxın günlərdə ictimaiyyətə açıqlaya bilər. Nəticə olaraq, Trampın siyasəti təkcə iqtisadi deyil, həm də texnoloji güc mübarizəsinə çevrilir.

Sərvanə Rəmixanova